ლუდი Carlsberg-ი საქართველოში რუსეთის ნაცვლად აზერბაიჯანიდან შემოვა. საქართველოში აღნიშნული ბრენდის ლუდი სადისტრიბუციო კომპანია „შარმ ტრეიდინგს“ შემოაქვს. როგორც „კომერსანტს“ „შარმ ტრეიდინგში“ განუცხადეს, საქართველო Carlsberg-ით რუსეთიდან მარაგდებოდა, მაგრამ ახლა „შარმ ტრეიდინგმა“ მომწოდებელი შეიცვალა და Carlsberg-ი რუსეთის ნაცვლად აზერბაიჯანიდან შემოვა.
„კომერსანტს“ „შარმ ტრეიდინგში“ განუცხადეს, რომ აზერბაიჯანის საწარმოდან Carlsberg-ის პირველი პარტია სექტემბერში შემოიტანეს. თუ რა წილი აქვს ქართულ ბაზარზე Carlsberg-ს სადისტრიბუციო კომპანიაში კომერციული მიზნებიდან გამომდინარე არ ასაჯაროებენ, თუმცა განმარტავენ, რომ მოთხოვნა ამ ბრენდის ლუდზე საკმაოდ მაღალია.
„ჩვენი მთავარი მიზანი წარმოების და საექსპორტო პოტენციალის გაზრდაა“, - ამის შესახებ განცხადება Carlsberg Azerbaijan-ის გენერალურმა დირექტორმა ალიუს ანტულისმა გააკეთა.
მან აღნიშნა, რომ კომპანიამ უკვე განახორციელა პროდუქციის ექსპორტი საქართველოში, რის შემდეგაც აპირებს ლუდის საექსპორტო პოტენციალის გაზრდას და ახალი ბაზრების მოძიებას.
„როგორც ვთქვი, ჩვენი მთავარი მიზანი საექსპორტო პოტენციალის გაზრდაა. ჩვენი მუშაობა ამ მიმართულებით გრძელდება. უკვე ვახორციელებთ ჩვენი პროდუქციის ექსპორტს საქართველოში. შემდგომში გვინდა მეტი პროდუქციის გაყიდვა მეზობელი ქვეყნის ბაზარზე. ჩვენ სხვა ბაზრებს ვეძებთ“- აღნიშნა Carlsberg Azerbaijan-ის გენერალურმა დირექტორმა.
კომპანიის წარმომადგენელმა თქვა, რომ აღნიშნულ საკითხებზე ინტენსიური მუშაობა მიმდინარეობს.
„საქსტატის“ ვებგვერდზე განთავსებული ინფორმაციის მიხედვით, მიმდინარე წელს საქართველოში აზერბაიჯანიდან ლუდის იმპორტი ივლისში განხორციელდა. სტატისტიკური ინფორმაციის მიხედვით, ივლისში აზერბაიჯანიდან 0.86 ათასი დოლარის ღირებულების ლუდი შემოვიდა. თუმცა „შარმ ტრეიდინგმა“ ლუდი სექტემბერში შემოიტანა, რაც საქსტატის ვებგვერდზე ჯერჯერობით ასახული არ არის, რადგანაც ამ დროისათვის მხოლოდ იანვარ-აგვისტოს საგარეო სავაჭრო ბრუნვის დეტალური მონაცემებია ხელმისაწვდომი.
Carlsberg-ი მსოფლიოში ერთ-ერთი მსხვილი დანიური ლუდსახარში კომპანიაა.
აღსანიშნავია, რომ რუსეთის უკრაინის ტერიტორიაზე შეჭრის შემდეგ იმ საერთაშორისო ბრენდებს შორის, რომელთაც რუსეთის ბაზარი დატოვეს Carlsberg–იცაა.
Carlsberg-ი ფლობს 140 ბრენდს, მათ შორის Carlsberg, Tuborg, Kronenburg, Baltika და სხვა. პროდუქცია იყიდება 150-ზე მეტ ქვეყანაში. 2021 წელს რუსეთში ბიზნესის შემოსავალმა $960 მილიონი, საოპერაციო მოგებამ $100,41 მილიონი შეადგინა.