დღეს საქართველოში დაახლოებით 200 000 ადამიანია, ვინც კრიპტოვალუტის საფულის მფლობელია, რაც დამწყები ბაზრისთვის საკმაოდ პერსპექტიული რიცხვებია, — ამის შესახებ emoney.ge/mycoins.ge კომერციულმა დირექტორმა ლუკა ლომსაძემ, ლევან ბოძაშვილის საავტორო გადაცემა „ნეირონში“ განაცხადა.

მისი თქმით, დღეს ერთ-ერთი კარგი დროა კრიპტოვალუტაში ინვესტირებისთვის, თუმცა ინვესტირებამდე აუცილებელია ბაზრის შესწავლა.

„თანამედროვე ბანკებს რაც ახლავთ საკუთარი ბიუროკრატიით, გაწერილი პროცესებით და სირთულეებით ეს ყველაფერი არის მოგვარებული კრიპტოვალუტაში და გარდაქმნილი ისე, რომ ერთი სექტორი ან ბანკი კი არ აკონტროლებს თქვენს თანხას, არამედ ეს არის დეცენტრალიზირებული. კრიპტოსამყაროში ორი ტიპის საფულე გვაქვს ე.წ. „ცხელი საფულე“ ანუ ბირჟის ანგარიში რომლითაც ბირჟა ემსახურება კლიენტს, მაგრამ არსებობს „ცივი საფულეები“, რომლებიც ისეთია სადაც ხდება კრიპტოვალუტის შენახვა, მაგრამ ისინი არანაირ კავშირში არ არიან რაიმე ტიპის კომპანიებთან. 

ის შემთხვევა რომ ვინმეს რაიმე ტიპის ხარვეზი ჰქონდეს თანხებთან ან დაკარგვასთან მიახლოებული შემთხვევა არასდროს გვქონია და არც გვექნება, რადგან მთავარ წესს ვითვალისწინებთ. დაზღვევაში მთავარი წესი არის ის რომ, ჩვენი კომპანია მომხმარებლების თანხებს არ ეხება, მაგალითად როგორც ეს FTX-ის შემთხვვაში მოხდა, რამაც მისი პრობლემები გამოიწვია. 

ბიტკოინის ყიდვას შევხედოთ ორი კუთხით, პირველი ვიყიდე იმიტომ რომ დავიწყე ინვესტირება და სარგებელის ნახვას ველი ან მეორე ვიყიდე ბიტკოინი იმისთვის რომ გამოვიყენო ის სატრანზაქციო თანხად და ვინმეს გადავურიცხო ან შევიძინო რაიმე. რაც შეეხება დღევანდელ სიტუაციას, ხდება ბიტკოინებზე ფასების ლავირება, თუმცა ვფიქრობთ მოხდება ფასების და ინვისტორების გაზრდა. ბიტკოინი შეზღუდული რაოდენობის არის და როდესაც ის ამოიწურება ფასის ლავირებაც უფრო მაღალი იქნება, მისი ძნელად მოპოვება თავიდანვე ერთ-ერთი მიზანი იყო, მალე ასეც მოხდება, ის ამოიწურება და მერე ფასიც გაიზრდება“, — აღნიშნა ლუკა ლომსაძემ.

ლუკა ლომსაძემ რეგულაციების დანარგვაზეც ისაუბრა და აღნიშნა, რომ ეს აუცილებელია, თუნდაც საერთაშორისო პარტნიორებთან ურთიერთობისთვის, რათა მათ გაუადვილდეთ ქართულ კომპანიებთან თანამშრომლობა.

„დღეს ერთ-ერთი კარგი დროა ინვესტიციისთვის, თუმცა რა თქმა უნდა საკუთარ სტრატეგიას უნდა მიანდონ ეს გადაწყვეტილება. ეს არის ის სექტორი, რომლის გარეშეც თანამედროვე ფინანსური სექტორი არ არსებობს. დღევანდელი ბარიერები გაცილებით შემცირდება, როდესაც სახელმწიფოები დანერგავენ რეგულაციებს. რა რეგულაციის პაკეტსაც მოისაზრებს ეროვნული ბანკი, არის ძალიან დადებითი, რადგან ამ ეტაპზე ძალიან ნაცრისფერი გარემოა და ეს გამოსასწორებელია. ლიცენზიის არაარსებობა დიდ პრობლემას ქმნის თუნდაც უცხოელ პარტნიორებთან ურთიერთობაში. რეგულაცია გულისხმობს, რომ კომპანიებს საკუთარი კლიენტურის ბაზის კონტროლი ჰქონდეთ, რაც გულისხმობს ვერიფიკაციის პროცედურების არსებობას და ტრანსაქციების გამჭვირვალობას. 

20 000-ზე მეტი კრიპტოვალუტა არსებობს, ბევრი მათგანის უკან არაფერი არ დგას, ამიტომ ვურჩევ ყველას ძირფესვიანად შეაფასონ ყიდვამდე კრიპტოვალუტა. სხვადასხვა კრიპტოვალუტა სხვადასხვა მიზანს ემსახურება, ამიტომ ამის ცოდნა და ინვესტირებამდე ყველაფრის მოკვლევა აუცილებელია“, — ამბობს ლუკა ლომსაძე.