რუსეთ-უკრაინის ომმა საქართველოს ტურისტული სფერო მნიშვნელოვნად დააზარალა. გარდა იმისა, რომ რუსი და უკრაინელი ტურისტების რაოდენობა მცირდება, ევროპელი ტურისტების უმრავლესობა ქვეყანაში ჩამოსვლისგან თავს იკავებს, როგორც სულ ცოტა ხნის წინ გახდა ცნობილი, ევროპის ქვეყნების მოქალაქეებმა ზაფხულის ჯავშნების 70% გააუქმეს. როგორც სფეროს წარმომადგენლები ,,კომერსანტთან“ აცხადებენ, ამ ეტაპზე ძირითადად ებრაელი ტურისტები აქტიურობენ, რომელთა უმეტესობა საშუალო ან დაბალმხარჯველ სეგმენტს წარმოადგენს.
მიიღე ინფორმაცია უფრო სწრაფად „კომერსანტის“ Telegram-ზე.
ტურიზმის სფეროს ექსპერტ მანანა ალადაშვილის ვარაუდით, ზაფხულის ტურიზმს ჩავარდნა არ ემუქრება, თუმცა გარკვეული პრობლემა მოსალოდნელია ევროპული ნაკადების მკვეთრი კლების გამო.
,,ევროპიდან ჯავშნების 70% გაუქმებულია. ამაზე სექტორის წარმომადგენლებმა უკვე განაცხადეს. ამ ეტაპზე ძირითადად ებრაელები აქტიურობენ, ინტერესი შეიმჩნევა აზერბაიჯანიდანაც. ასევე განიხილება აზიისა და არაბული ქვეყნები, თუმცა დიდწილად მაინც ისრაელიდან აქტიურობენ. ეს არის საშუალო და დაბალმხარჯველი სეგმენტი, მაღალხარჯიანი ტურისტი საქართველოსკენ არ წამოვა. მხარჯველი ტურისტი განსაკუთრებული კატეგორიაა. საქართველო ასეთი მოგზაურებით დიდად განებივრებული არ არის. ძალიან სუსტები ვართ მომსახურების სეგმენტში, მილიონობით ტურისტია ევროპის წამყვან ქალაქებში და მათი მომსახურება იმდენად დახვეწილი და კომფორტულია, არც იგრძნობა, რომ ყოველდღიურად ამდენ ადამიანს უწევენ მომსახურებას, არ იგრძნობა გადატვირთვა, მომსახურება უმაღლეს დონეზეა. აქ კი ფასები ისეთი მაღალია, რომ ევროპულს უკვე გაუთანაბრდა, ხოლო მომსახურების ხარისხის მხრივ შედარებაც არ არის, დიდი ჩამორჩენაა. ცხადია, ასეთ პირობებში დასვენების მსურველთა რაოდენობა ბუნებრივად იკლებს, რაც მოსალოდნელია“, - ამბობს ალადაშვილი ,,კომერსანტთან“.
შედარებისთვის, როგორც მანანა ალადაშვილი აღნიშნავს, საფრანგეთში 5-ვარსკვლავიან სასტუმროში 1 ნომერი დღიურად 220-250 ევროდან თუ ღირს, ანალოგიური ფასია საქართველოშიც, თუმცა ხარისხი სტანდარტთან ხშირ შემთხვევაში შეუსაბამოა.
რაც შეხება უშუალოდ ზაფხულის ტურიზმთან დაკავშირებულ მოლოდინს, რესტორატორთა ასოციაციის ხელმძღვანელის შოთა ბურჯანაძის თქმით, შესაძლოა აზერბაიჯანიდან, აზიისა და არაბული ქვეყნებიდან ჩანაცვლდეს ის ნაკადები, რომელიც უკრაინიდან და რუსეთიდან შემოდიოდა, მაგრამ ესეც ომის შედეგზეა დამოკიდებული.
,,ახლა მოლოდინის განსაზღვრა არის ურთულესი. ცხადია, რომ ბაზრების დივერსიფიცირება უნდა მოხდეს, ამ შემთხვევაში, ეს შეიძლება იყოს აზერბაიჯანის ბაზარი, ასევე აზიის და არაბული ქვეყნებიდან ჩანაცვლდეს ის ნაკადები, რომელიც უკრაინიდან და რუსეთიდან შემოდიოდა. თუმცა, თუკი ესკალაცია გამწვავდება, ეს მოლოდინიც შეიძლება გაქარწყლდეს“, - ამბობს ბურჯანაძე ,,კომერსანტთან“.
ტურიზმის ეროვნული ადმინისტრაციის ინფორმაციით, 2022 წლის მარტში, 2019 წლის ანალოგიურ პერიოდთან შედარებით, ტურისტული ვიზიტების აღდგენის კოეფიციენტი 48.5%-ს შეადგენს. როგორც უწყებაში განმარტავენ, იანვარი-მარტის პერიოდში აღდგენის დინამიკა ტურისტების რაოდენობის კუთხით 52%-ს აღწევს.
მარი ჩიტაია