საქართველოში COVID 19 -ის შემთხვევების მატება შეინიშნება — ხომ არ არის პანდემიის ახალი ტალღის აფეთქების საშიშროება, რამ გამოიწვია ასეთი ზრდა და რა შტამია ახლა საქართველოში გავრცელებული? „კომერსანტი“ ამ თემაზე პაატა იმნაძის მოსაზრებებს გაგაცნობთ. თუმცა მანამდე დაავადებათა კონტროლის ეროვნული ცენტრის მონაცემები - 13-19 ივნისის პერიოდში კორონავირუსით ინფიცირების 616 შემთხვევა დაფიქსირდა, ანუ წინა ერთ კვირასთან შედარებით 100-ით მეტი შემთხვევაა.
ასეთივე ტენდენციაა, უფრო რთული სურათით, სხვა ქვეყნებშიც. მაგალითად ისრაელში უკვე არ გამორიცხავენ, რომ კორონავირუსის ეპიდემიის მეშვიდე ტალღა იწყება. გასული კვირის ბოლოს, აპრილის შუა რიცხვებიდან პირველად, ერთ დღეში დღიურად 7000 -ზე მეტი შემთხვევა აღირიცხა. ისრაელში ასევე გაზრდილია ჰოსპიტალიზაციის მაჩვენებელიც. ისრაელში გავრცელებულია ომიკრონს BA.5 შტამი. კორონავირუსის ახალი შემთხვევები გაზრდილია ამერიკის, აღმოსავლეთ ხმელთაშუაზღვისპირეთის და სამხრეთ-აღმოსავლეთ აზიის ქვეყნებში.
რა მდგომარეობაა საქართველოში, არის თუ არა კორონავირუსით ინფიცირების შემთხვევების კიდევ გაზრდის საფრთხე, რა უნდა გაკეთდეს ინფიცირების მაჩვენებლის ზრდის პრევენციისთვის? — ამ და სხვა კითხვებით „კომერსანტი“ დაავადებათა კონტროლის ეროვნული ცენტრის დირექტორის მოადგილეს პაატა იმნაძეს დაუკავშირდა.
„იგივე ვიტყვი, რასაც ამდენ ხანს ვამბობდი, კოვიდი არსად არ წასულა! ჯერჯერობით სამწუხაროდ ოდნავ მატება გვაქვს. თუ აქამდე კვირაში 500 შემთხვევა გვქონდა გასულ კვირაში მათმა რაოდენობა 616 შეადგინა. საბედნიეროდ ლეტალობა მაღალი არ არის, კვირაში რამდენიმე შემთხვევაა.
მთავარ რეკომენდაციად რჩება ის, რომ მოსახლეობას აცრისკენ მოვუწოდოთ, ხოლო მათ ვინც აცრილია ბუსტერ დოზით აიცრან. ეს განსაკუთრებით 50 წელს გადაცილებულებს ეხება. დღეის მდგომარეობით, საქართველოში ძირითადად გავრცელებულია ომიკრონის კიდევ ერთი BA5 ვარიანტი, რაც შეეხება ჰოსპიტალიზაციას დღიურად ერთეული შემთხვევები გვაქვს“, - აღნიშნა პაატა იმნაძემ.
იმნაძის თქმით აცრის ტემპი ძალიან შემცირებულია და კვირაში რამდენიმე ასეულს აღწევს, მისივე თქმით მოსახლეობის ნახევარიც არ არის აცრილი.
რაც ეხება კოვიდპანდემიის მორიგ ტალღას, პაატა იმნაძე ამ თემასთან დაკავშირებით პროგნოზს ჯერჯერობით არ აკეთებს
თაკო კვაჭანტირაძე