კვლევითი ცენტრ CRRC საქართველოს მიერ ჩატარებული სატელეფონო გამოკითხვის მიხედვით. გამოკითხულთა 80% რუსეთ-უკრაინის ომში რუსეთს ან პირადად ვლადიმერ პუტინს ადანაშაულებს, 7% კი აშშ-ს, უკრაინის მთავრობას, პირადად ვოლოდიმირ ზელენსკის, ნატოსა და ევროკავშირს. 13%-ს პასუხი არ აქვს, ან უარს აცხადებს პასუხზე.

ინტერვენციის მიზეზებზე დასმულ კითხვაზე გამოკითხულთა 34% რუსეთის საზღვრების გაფართოების მცდელობას ასახელებს, 25% უკრაინის დაპყრობას, 20% საბჭოთა კავშირის აღდგენას, 7% რუსეთის იმპერიის აღდგენას, 17% ნატოში გაწევრიანებისთვის ხელის შეშლას, 4% უკრაინის დაშლას, 2% უკრაინის განვითარების ხელის შეშლას, 1% პროდასავლური ორიენტაციის შეცვლას და 1%-ზე ნაკლები რუსულენოვანი მოსახლეობის დაცვას. რადგან ამ კითხვაზე 2 პასუხის მონიშვნაც შესაძლებელი იყო, პასუხების ჯამმა 100%-ს გადააჭარბა.

გამოკითხულთა 32% ფიქრობს, რომ საქართველოს მთავრობა უკრაინას მხარს საკმარისად უჭერს, 61%-ის აზრით მხარდაჭერა უფრო მეტი უნდა იყოს, 2%-ის აზრით უფრო ნაკლები, 1% ყველანაირ მხარდაჭერას ეწინააღმდეგება.

გამოკითხულთა 71%-ის აზრით რუსეთის წინააღმდეგ ამოქმედებული სანქციები უნდა გამკაცრდეს, 10%-ის აზრით ისინი უკვე საკმარისად მკაცრია, 4% მათ შემსუბუქებას, 3% კი სრულ გაუქმებას უჭერს მხარს.

39% მომხრეა, რომ საქართველო სანქციებს სრულად შეუერთდეს, 27 მიიჩნევს, რომ საქართველო სანქციებს ნაწილობრივ უნდა შეუერთდეს, 19% სანქციების შეერთებას სრულად ეწინააღმდეგება.