დასავლეთ საქართველოში „ჰეივორდის“ ჯიშის კივის მოსავლის აღება აქტიურ ფაზაშია. ფერმერები EastFruit-თან საშუალო მოსავლიანობაზე, ადგილობრივ ბაზარზე სტაბილურ ფასსა და გაზრდილ საექსპორტო ფასებზე საუბრობენ. მთლიანობაში ამინდმა დიდი ზიანი არ მიაყენა წლევანდელ მოსავალს, მაგრამ ზაფხული-შემოდგომის მიჯნაზე ინტენსიურმა წვიმებმა მაინც იქონია გავლენა პროდუქტის ზომებზე. იგივე მოხდა ამ სეზონზე მანდარინის შემთხვევაშიც.

საქართველოს კივის მწარმოებელთა ასოციაციის ხელმძღვანელის დემურ ფიფიას თქმით, წინასწარი მონაცემებით, კივის მოსავლიანობამ 90-100 ტონა უნდა შეადგინოს, რაც საშუალო მოსავლიანობას ნიშნავს. ასოციაცია თავის მოსავალს კომპანია Nergeta-ზე ყიდის, რომელიც საქართველოში კივის უმსხვილესი მწარმოებელი და ექსპორტიორია. Nergeta-ს თავისი მოთხოვნები აქვს: ის ფერმერებისგან მხოლოდ მსხვილ ნაყოფს ყიდულობს (მინიმუმ 90 გრ). დანარჩენ მოსავალს ასოციაცია ადგილობრივ ბაზარზე ყიდის.

Nergeta-ფ შესასყიდი ფასი შარშანდელი 3,8 ლარიდან წელს 4,5 ლარამდე ასწია. გაცილებით მაღალი ფასის მიუხედავად ფერმერები ამაში მნიშვნელოვან სარგებელს ვერ ხედავენ, რადგან ქვეყანაში სხვადასხვა საქონელზე ფასები მნიშვნელოვნადაა გაზრდილი. ამასთან მთელ მოსავალში ხარისხიანი პროდუქცია 30-40%-ს შეადგენს. წვრილი ნაყოფის ფასი ადგილობრივ ბაზარზე კილოგრამზე საშუალოდ 2 ლარს შეადგენს, რაც, ფერმერების თქმით, უკვე რამდენიმე სეზონია, არ იცვლება.

ფერმერები აღნიშნავენ, რომ ადგილობრივ ფასებზე იმპორტი ახდენს გავლენას - განსაკუთრებით ირანიდან. საქართველოდან კივი მცირე მოცულობებით გადის ექსპორტზე იაპონიასა და გერმანიაში. ამასთან, იმპორტი მთელი წლის განმავლობაში ხორციელდება და ყველაზე მეტი კივი ნოემბერი-აპრილის პერიოდში შემოდის. გასულ სეზონზე (ნოემბერი-აპრილი) იმპორტმა 1 183 ტონა შეადგინა, როდესაც ადგილობრივმა მოსავალმა შარშან 1 500 ტონა შეადგინა. მონაცემები გვიჩვენებს, რომ იმპორტი ყოველწლიურად იაფდება. ოქტომბერში 1 ტონა იმპორტული კივი საქართველოში $390-ად შემოდიოდა, რაც 15%-ით ნაკლებია 2018 წლის ოქტომბრის ფასზე.

EastFruit