ბათუმში მობილური ტელეფონების დამტენების გაზიარების სერვისი გამოჩნდა, ხოლო კვირის ბოლომდე დამტენი სადგურები თბილისშიც განთავსდება.
მობილურების დამტენების გაზიარების სერვისის შემომყვანი კომპანია “ბინეს” გენერალური მენეჯერი მიშა მაისურაძე BM.GE-სთან საუბრისას აღნიშნავს, რომ ბათუმში ამ ეტაპზე 50 დამტენი სადგური განთავსდა, ხოლო 50 სადგური თვის ბოლომდე დამონტაჟდება.
რაც შეეხება თბილისს, დედაქალაქში კვირის ბოლომდე 50 სადგური განთავსდება, ხოლო თვის ბოლომდე მისი რაოდენობა ჯამში 300-ს შეადგენს.
“ბათუმში დამტენების გაზიარების სერვისი ერთი კვირაა გვაქვს და ის წარმატებით მუშაობს, მას ხალხი აქტიურად მოიხმარს. ეს ელექტრო სკუტერების დაქირავების მსგავსი სისტემაა. მობილურის დამტენს აპლიკაციით ქირაობთ, გადაადგილდებით, სადაც გსურთ, ერთი უბნიდან მეორეში, ან ერთი ქალაქიდან მეორეში. გაზიარების სერვისის შესაძენად, აპლიკაციას QR კოდით დაასკანერებთ და მასზე ბარათს მიაბამთ.” - განმარტა “ბინეს” გენერალურმა მენეჯერმა.
“ბინეს” გაზიარების სერვისით ორი საათით სარგებლობა 4 ლარი ეღირება, ხოლო თითო სადგურზე ოთხი მობილურის დამტენი განთავსდება. მისი დამონტაჟება სხვადასხვა უბნის და ქალაქების პარალელურად, რესტორნებსა და ავტობანებზეც იგეგმება.
კომპანიამ ჯამში 30 000 დოლარის ინვესტიცია უკვე განახორციელა.
წყარო: https://bm.ge/
მობილური ტელეფონების დამტენები
