საქართველოში წარმოებული მოსაპირკეთებელი ქვები, Colliers MMS-ისა და ზოდის პარტნიორობით, ევროპის საუკეთესო ქვის შოურუმებში გაიყიდება. ქართული გრანიტი და მოსაპირკეთებელი კირქვა პირველად იტალიის ბაზარზე შევა და დასაწყისისთვის რომის, მილანისა და ვერონას ქვის ბუტიკებსა და შოურუმებში განთავსდება. წარმატებით დასრულდა მოლაპარაკება ამ სფეროში ერთ-ერთ მოწინავე იტალიურ კომპანიასთან, რომელმაც ქართული პროდუქციის დეტალური ხარისხობრივი ექსპერტიზის საფუძველზე მიიღო პროდუქციის შეძენის გადაწყვეტილება. ამ ეტაპზე, კოლიერსის ბუნებრივი რესურსების საკონსულტაციო გუნდის მხარდაჭერით მიმდინარეობს მოლაპარაკებები ბელგიურ, იტალიურ და გერმანულ კომპანიებთან, რომლებმაც გამოთქვეს კომპანია ზოდის მიერ წარმოებული ბუნებრივი ქვების შეძენის ინტერესი.
ზოდისა და Colliers MMS-ის თანამშრომლობა ორ წელსა და არაერთ წარმატებულ პროექტს ითვლის. Colliers MMS-ის მხარდაჭერით, ზოდი - ქართული ბაზრის ლიდერი კომპანიაა ბუნებრივი ქვების წარმოებაში, ეტაპობრივად აფართოებს სანედლეულო ბაზას. მიმდინარე წლიდან კი კომპანიები პარტნიორულ ურთიერთობას იწყებენ ქართული ქვის პროდუქციის საერთაშორისო ბაზარზე გასატანად.
-"იტალიური და სხვა ევროპული კომპანიების დაინტერესება ადასტურებს ჩვენი წარმოების საუკეთესო ევროპულ სტანდარტებთან თავსებადობას. სიამაყით ავღნიშნავთ, რომ ჩვენს კომპანიაში წარმოებული პროდუქცია კონკურენტულია მოწინავე ქვეყნების ანალოგიურ პროდუქტებთან. ქვის ხარისხი და დამუშავების ტექნოლოგია განმსაზღვრელი კრიტერიუმებია მაღალხარისხიანი ბაზრებისთვის, ამ მიმართულებით შეგვიძლია ვთქვათ, რომ ზოდის ხარისხი უტოლდება საერთაშორისო სტანდარტს და ჩვენი პროდუქცია ხდება მიმზიდველი ამ სფეროში ყველაზე უფრო დახვეწილი და ხარისხიანი კრიტერიუმების მქონე ქვეყნებისთვის” - აცხადებს “ზოდის ” დამფუძნებელი ზაურ გაბაიძე.
რამდენიმე თვეა, Colliers MMS-მა, სხვა სერვისებთან ერთად, მინერალური რესურსების ექსპორტის ხელშეწყობის მომსახურებაც დანერგა. სერვისის მიზანია დაეხმაროს საქართველოში მოქმედ კომპანიებს საკუთარი პროდუქციის საერთაშორისო ბაზრებზე განთავსებაში. მომსახურება გულისხმობს საექსპორტო ბაზრების იდენტიფიცირებას, მსყიდველუნარიანი საერთაშორისო კლიენტების მოძიებას, სავაჭრო მოლაპარაკებებსა და სათანადო ტექნიკურ თუ სამართლებრივ მხარდაჭერას.
“- ჩვენი მიზანია ვაჭრობადი, საექსპორტო პოტენციალის მქონე პროდუქციის იდენტიფიცირება, ქართული წარმოების მინერალური ნედლეულის საერთაშორისო სავაჭრო ქსელებში ჩართვა და ადგილობრივი მწარმოებლების მხარდაჭერა, რათა მათ მოხერხონ საკუთარი პროდუქციის საერთაშორისო ბაზარზე გატანა, სავაჭრო ქსელების გაფართოება და საექსპორტო არეალის დივერსიფიცირება. მნიშვნელოვანია, რომ ადგილობრივმა მწარმოებლებმა იცოდნენ ცალკეული პროდუქტის მიმართ არსებული საერთაშორისო მოთხოვნები და სამომხმარებლო სტანდარტები. ეს ხელს უწყობს ჩვენი პროდუქციის ხარისხობრივ გუმჯობესებას, წარმოების სტანდარტის დახვეწას, რაც თავისმხრივ ქართული პროდუქციის სავაჭრო პოტენციალის ქვეყნის გარეთ ზრდაზე აისახება. გვაქვს სოლიდური რესურსი წიაღისეულისა და მინერალების სექტორში, რომლის ეკონომიკურ ბრუნვაში უფრო აქტიური ჩართვაა შესაძლებელი არა მხოლოდ ქვეყნის შიგნით, არამედ საერთაშორისო ბაზარზე. ჩვენს ქვეყანას ამ მხრივ მნიშვნელოვანი პოტენციალი აქვს და ჩვენი ამოცანაა ამ პოტენციალის მაქსიმალური ათვისება” - აღნიშნავს Colliers MMS-ის მმართველი დირექტორი მაია ზავრაშვილი.
(R)