რამდენიმე წისქვილკომბინატების დახურვის პარალელურად, ქვეყანაში ქატოს იმპორტი იზრდება. სტატისტიკის ეროვნული სამსახურის მონაცემებით, მიმდინარე წლის ოქტომბერში 1,561 ტონა (219.2 ათასი ლარი) ქატოს იმპორტი განხორციელდა, გასული წლის ანალოგიურ პერიოდში - 703.2 ტონა (95.9 ათასი ლარი).

ამასთან, გაზრდილია ქატოს იმპორტის თვიური მაჩვენებელიც. კერძოდ, თუ 2021 წლის ოქტომბერში - 1,561 ტონა პროდუქტი შემოვიდა, სექტემბერში - 870 ტონა იყო, ხოლო აგვისტოში - 542.3 ტონა.

დავინტერესდით, საიდან ხორციელდება ქატოს იმპორტი. როგორც სტატისტიკის ეროვნული სამსახურის მონაცემებიდან ჩანს, წელს (10 თვის განმავლობაში) საქართველომ პროდუქტი მხოლოდ ორი ქვეყნიდან, აზერბაიჯანიდან (7 166 ტონა) და რუსეთიდან (67.7 ტონა) შემოიტანა.

შეგახსენებთ, რომ საქართველოში 10-მდე წისქვილკომბინატი უკვე დაიხურა. როგორც ხორბლის და ფქვილის მწარმობელთა ასოციაციის ხელმძღვანელმა ლევან სილაგავამ განაცხადა, ხორბლის გაძვირების ფონზე, რუსული ფქვილი შემოვიდა, რომელიც გაცილებით იაფია. შესაბამისად, წისქვილები კონკურენციას ვერ უძლებენ.

„უკვე დაიხურა რამდენიმე წისქვილკომბინატი, მათ შორის, ბათუმში - „ოქროყანა“, კიდევ ორი გაჩერდა ბათუმში, გორში გაჩერდა „ქართული ხორბალი“, წნორში გაჩერდა ერთი, ასევე კახეთში რამდენიმე. ჯამში, დაახლოებთ, 10-მდე ობიექტზეა საუბარი. დანარჩენებმა შეამცირეს სიმძლავრეები, იმიტომ, რომ რუსული ფქვილი შემოვიდა და კონკურენციას ვერ უძლებენ. თუმცა, აქ კონკურენცია კი არა, არათანაბარი პირობებია, ხორბალთან და ფქვილთან მიმართებით.

ხორბლის გადამუშავება ჩვენთან ღირებულებათა მთელ ჯაჭვს ქმნის - დასაქმება, ქატოს გადამუშავება (თუ წისქვილკომბინატი გაჩერდა, ქატოს იმპორტიც უნდა განხორციელდეს), ამასთან, ადგილობრივი ხორბალს, რომელიც პროგრამებით ფინანსდება, წისქვილკომბინატი თუ გაჩერდა, თავისთავად ვერც ამ ხორბალს იყიდის. პლუს ამას, სასურსათო უსაფრთხოების პრობლემა ჩნდება. იმიტომ, რომ ხორბლის შემთხვევაში ჩვენ 2-თვიანი მარაგებით ვმუშაობთ, ფქვილზე - არა. თუ კონიუქტურა კიდევ უფრო დაიძაბა, შესაძლოა, ხორბლის და ფქვილის მიმართულებით საკმაოდ კრიტიკული სიტუაცია შეიქმნას“,- აღნიშნა ლევან სილაგავამ.

წყარო: "ბიზნესპრენიუსი"