2019 წლის შემდეგ სტუმარმასპინძლობის (Hospitality) სექტორში ხელფასები მნიშვნელოვნადაა გაზრდილი. როგორც „კომერსანტთან“ რესტორატორთა ასოციაციის ხელმძღვანელმა შოთა ბურჯანაძემ განაცხადა, ბოლო პერიოდში სექტორში ხელფასების 300%-მდე ზრდა ფიქსირდება.
„კოვიდ ვითარების შემდეგ სრულად შეიცვალა ტურიზმის სფეროში დამოკიდებულება ყველა მიმართულებით, რაც შეიძლება ადამიანმა წარმოიდგინოს.
ჩვენ თუ კითხვას დავსვამთ, რამდენადაა დღეს სახელფასო ბიუჯეტი გაზრდილი, ნებისმიერ პოზიციაზე, რომელიც არსებობს ჰოსპიტალიტის სფეროში ვითარება შეცვლილია და სხვადასხვა პოზიციების მიხედვით დაახლოებით 100-დან 300%-მდეა გაზრდილი.
ამ შემთხვევაში გამოირჩევა მზარეულის და მიმტანის ხელფასი, რომელიც იმის გარდა, რომ სახელფასო ბიუჯეტიდან იღებენ თანხას, გარდა ამისა „ჩაიც“ ძალიან გაზრდილია.
მიმტანის, ასევე მზარეულის ხელფასი რაც კოვიდამდე იყო, პირობითად, 800-დან 1500 ლარამდე, დღეს 1500-დან 4500 ლარამდეა გაზრდილი. ხშირ შემთხვევაში გაორმაგებულია ან გასამმაგებულია“, - განმარტავს ბურჯანაძე.
რესტორატორთა ასოციაციის ხელმძღვანელი აცხადებს, რომ დღეს ქვეყანაში არიან მზარეულები, რომელთა ხელფასიც 10 000 ლარამდეც კი აღწევს.
„ბოლო პერიოდში საქართველოშიც მოთხოვნადი გახდა, შეფი, რომელიც ბევრი არ გვყავს, მაგრამ ერთეულები არიან. დაახლოებით 30-მდე შეფი, რომლის ანაზღაურება შესაძლოა რამდენიმე ათასი ლარი იყოს, 5000-დან ზემოთ, 10 000-მდეც კი ადის.
ეს არის ის შეფი, რომელიც რეალურად არის შეფი. შეფი ეს არის პიროვნება, რომელიც ქმნის მენიუს, ქმნის რესტორანს და მასზეა აწყობილი რესტორანი და ეს არ არის მხოლოდ და მხოლოდ სტუმრის მიღების დროს საჭმლის გამკეთებელი, ის არის კერძის შემქმნელი. ის ქმნის კონკრეტული რესტორნისთვის კერძს და შესაბამისად ამ კერძზეა აწყობილი რესტორანი. ამ შეფის ხელფასი ათასობით ლარია და შეიძლება ითქვას, ცნობილი პროფესიების ხელფასს ბევრად აღემატება“, - განმარტავს შოთა ბურჯანაძე.