22 ნოემბერს, ,,საქართველოში სიძულვილის ენაზე რეაგირების ეროვნული მექანიზმების სისტემური დოკუმენტირების" ანგარიშის პრეზენტაცია გაიმართება. ორგანიზატორების ინფორმაიცით, ღონისძიება ონლაინ რეჟიმში ჩატარდება. ღონისძიებაზე განხილული იქნება ამ ფენომენთან ბრძოლის პრიორიტეტული მიმართულებები.

„ანგარიში მოიცავს ქვეყანაში სიძულვილის ენის ელემენტებისა და დინამიკის მიმოხილვას და ასევე, ყველა დაინტერესებული მხარისთვის რეკომენდაციებს, თუ როგორ უნდა მოხდეს მათზე რეაგირება. ანგარიში ეხმიანება ევროპის საბჭოს რასიზმის და შეუწყნარებლობის წინააღმდეგ ევროპული კომისიის (ECRI) სიძულვილის ენასთან ბრძოლის შესახებ ზოგადი პოლიტიკის რეკომენდაცია No. 15-ს, რომელიც ხაზს უსვამს სიძულვილის ენის დაძლევის ყოვლისმომცველი მიდგომის მნიშვნელობას და გამოხატვის თავისუფლების უფლების სხვა უფლებებთან, განსაკუთრებით სიძულვილის ენის სამიზნე ჯგუფების უფლებებთან, შეჯერების აუცილებლობას”, - აღნიშნულია ინფორმაციაში.

შეხვედრას ევროპის საბჭოს საქართველოს ოფისის ხელმძღვანელის მოადგილე სტეფან სირბუ უხელმძღვანელებს. ხოლო ღონისძიებას გახსნიან ევროპის საბჭოს ინკლუზიური და ანტიდისკრიმინაციული პროგრამების განყოფილების ხელმძღვანელი ირენა გუიდიკოვა და საქრთველოში ევროკავშირის წარმომადგენლობის პოლიტიკის, პრესისა და ინფორმაციის განყოფილების უფროსის მოადგილე ევია კოტანი.