„საქართველოში უცხოელი წყვილების ქორწილების რაოდენობა პანდემიამდელ მაჩვენებელს გაუტოლდა, ასეთ მატებას ჩვენც არ ველოდით“, - ამის შესახებ შესახებ, რადიო „კომერსანტის“ გადაცემაში, „კომერსანტის დილა“ მალიბუს ყვავილების თანადამფუძნებელმა ლიკა ჯიღაურმა ისაუბრა. მისი თქმით, საქართველოში ცერემონიებისთვის შემოსული წყვილები საკმაოდ მრავალფეროვანი იყო, თუმცა უმეტესი რაოდენობა ფილიპინებიდან ჩამოვიდა.

კითხვაზე, თუ რატომ არის  საქართველო წვეულებებისა და ქორწილებისთვის მიმზიდველ ქვეყნად, ლიკა ჯიღაური პასუხობს, რომ პირველ რიგში მათთვის ძალიან მიმზიდველია ბუნება, ხოლო რაც შეეხება რეგიონს,  ყველაზე დიდი პოპულარობით ყაზბეგი, გუდაური და კახეთი სარგებლობს.

„პატარა ცერემონიებისთვის და კამერული ქორწილებისთვის თბილისსაც ირჩევენ, თუმცა ძირითადი მოცულობა ამ რეგიონებზე მოდის, თუნდაც ქორწილის შემთხვევაში, რადგან როდესაც  ეს ადამიანები ქორწილისთვის ჩამოდიან სტუმრების ძალიან მცირე რაოდენობა მოჰყვებათ და ძირითადი დატვირთვა მოდის იმ ბუნებაზე სადაც ღონისძიება იგეგმება“ -  აღნიშნა ლიკა ჯიღაურმა.

ჯიღაურის თქმით, როგორც ყველა ბიზნესს, კადრების  დეფიციტის პრობლემა მათაც აქვთ. ასევე ხშირია შემთხვევები, როდესაც კადრი აჰყავთ, მათთან სწავლობენ საქმეს და შემდეგ დამოუკიდებლად თავიანთ ბიზნესს იწყებენ. მისივე თქმით, ცერემონიების გასაფორმებლად ყვავილების შეძენა, როგორც ადგილობრივ ბაზარზე ასევე საერთაშორისო ბაზრებზე ხდება, რადგან რიგი გარკვეული ყვავილები საქართველოში ვერ მოდის.

„არის რაღაც სახეობები,  რომლებიც  ჩვენთან  არსებულ  სათბურებში მოჰყავთ, მაგრამ არის  სახეობები, რომლის იმპორტიც აუცილებელია,  რადგან ადგილობრივ ბაზარზე ფიზიკურად არ  არის.  ზაფხულში ყვავილებს  ძირითადად ადგილობრივ ბაზარზე  ვყიდულობთ, თუმცა ზამთარში შემოტანა გვიწევს.

როდესაც  ღონისძიებას ვგეგმავთ მხოლოდ  დეკორზე აქცენტი არ გვაქვს, აქ მთელი სერვისია  ჩართული, აქ უნდა იყო სასტუმრო, სადაც ისინი დარჩებიან, ტრანსპორტირების მხარე უნდა იყოს მოგვარებული, სარესტორნო სივრცე და სხვა  დანარჩენი სერვისები, მაგალითად ფოტო-ვიდეო მომსახურება. ასევე უცხოელ წყვილებში  ძალიან პოპულარულია ღონისძიების  წამყვანი, რომელიც თამადის თანამედროვე ვერსიაა და ის აცნობს წყვილებს ქართულ კულტურას, სთავაზობს გარკვეულ მასტერკლასებს, მაგალითად ცეკვის მასტერკლასი და სხვა“, - აღნიშნა ლიკა ჯიღაურმა.

ლიკა ჯიღაურის თქმით, მიუხედავად იმისა რომ ყველაფერი  ძვირდება, მაინც ცდილობს რომ პანდემიამდელი ბალანსი დაიცვას და მომსახურება არ გააძვიროს.

თაკო კვაჭანტირაძე