საქართველოდან ლუდის ექსპორტი 193%-ითაა გაზრდილი. საქსტატის ინფორმაციით, 2023 წლის იანვარში საქართველოდან ექსპორტზე 249.75 ტონა ლუდი გავიდა, 2022 წლის იანვარში კი 85.25 ტონა.

იანვრის მაჩვენებლების თანახმად, ექსპორტირებული ლუდის 28,5%-ი ყაზახეთის ბაზარზე შევიდა. შესაბამისად იანვრის სტატისტიკით ქართული ლუდისთვის #1 საექსპორტო ბაზარი ყაზახეთია, სადაც საანგარიშო პერიოდში 71.28 ტონა ლუდი გადაიზიდა. მეორე ადგილზეა რუსეთი, სადაც საქართველოდან 62.05 ტონა ლუდის ექსპორტი განხორციელდა. საექსპორტო ბაზრების ჩამონათვალში მესამე ადგილზეა სომხეთი, სადაც იანვარში 55.15 ტონა ლუდის ექსპორტი ფიქსირდება.

2023 წლის იანვარში საქართველოდან ექსპორტირებული ლუდის საერთო ღირებულება 296.51 ათასი დოლარი იყო, ხოლო გასული წლის ანალოგიურ პერიოდში კი ქვეყნიდან 65.96 ათასი დოლარის ლუდი გავიდა.

ბოლო 14 წლის სტატისტიკით ქვეყნიდან ყველაზე დიდი რაოდენობით ლუდის ექსპორტი 2020 წელს ფიქსირდება - სულ 5,492.63 ტონა.

რაც შეეხება ბოლო ორი წლის სტატისტიკის შედარებას 65%-იანი ზრდაა. 2022 წელს საქართველოდან მსოფლიოს სხვადასხვა ბაზარზე 4,796.73 ათასი დოლარის ღირებულების 5,082.73 ტონა ლუდის ექსპორტი ექსპორტი განხორციელდა. ქართული ლუდი 2022 წელს 29 ქვეყნის ბაზარზე გაიყიდა, თუმცა ლიდერი მაინც ყაზახეთი (1,390.76 ტონა) და ჩინეთია (847.88).