2022 წელს საქართველოში 52 აივ ინფიცირებული პაციენტი გარდაიცვალა. აღნიშნულ ინფორმაციას ინფექციური პათოლოგიის, შიდსის და კლინიკური იმუნოლოგიის ცენტრი ავრცელებს.
მათივე ინფორმაციით, 15 მაისის მონაცემებით, ინფექციური პათოლოგიის, შიდსის და კლინიკური იმუნოლოგიის ცენტრში რეგისტრირებულია 9349 აივ ინფიცირებული პირი, 6982 – მამაკაცი, 2367 – ქალი. პაციენტთა უმრავლესობა 29-დან 39 წლამდეა. 1989 – გარდაიცვალა.
ამასთან, 15 მაისის მონაცემებით, არვ მკურნალობას იტარებს 5785 პაციენტი, მათ შორის 43 – ბავშვია.
აივ ინფიცირების შემთხვების რეგიონული განაწილება: თბილისში (3515 შემთხვევა, მათგან 91 უცხოეთის მოქალაქეა 2 დაუდგენელი); სამეგრელოში - 1235; იმერეთში - 1119; აჭარაში - 1079; აფხაზეთში -541; კახეთში - 465; ქვემო ქართლში - 549; შიდა ქართლში -357; გურიაში - 200; სამცხე-ჯავახეთში - 131 და ა.შ.
2022 წლის 15 მაისის მონაცემებით, გამოვლენილია 187 ახალი შემთხვევა. შარშან შესაბამის პერიოდში რეგისტრირებული იყო 191 ახალი შემთხვევა.
გამოვლენილ ახალ შემთხვევათა განაწილება გადაცემის გზების მიხედვით ასეთია: სულ საქართველოში გამოვლენილია 123 აივ ინფიცირებული ბავშვი. მათ შორის 72 – ვაჟი, 51 – გოგონა. 32 გარდაიცვალა, სამმა დატოვა ქვეყანა. 2022 წელს (15 მაისის მონაცემებით) გამოვლინდა 2 შემთხვევა. ბავშვთა შორის შემთხვევების განაწილება ინფიცირების გზების მიხედვით ასეთია: ვერტიკალური (დედისგან) გადაცემით დაინფიცირდა 115 ბავშვი (მათგან 1 – ძუძუთი კვებით), სისხლის რეციპიენტია – 5, დაუდგენელია – 3 შემთხვევა.
ხვალ, 15 მაისს, მსოფლიო ცივილიზებული ქვეყნები შიდსით გარდაცვლილთა საერთაშორისო დღეს აღნიშნავენ. აღნიშნულ თარიღს საქართველოში უკვე 26 წელია აღნიშნავენ და სხვადასხვა აქტივობით მიაგებენ შიდსით გარდაცვლილთა ხსოვნას პატივს.
ინფექციური პათოლოგიის, შიდსის და კლინიკური იმუნოლოგიის ცენტრის ცნობით, მიმდინარე წელს ექიმი-ეპიდემიოლოგები ინფექციური პათოლოგიისა და შიდსის ცენტრის ხელმძღვანელობა მოწვეულ სტუმრებსა და მედიის წარმომადგენლებს საქართველოში არსებულ ეპიდ-ვითარების სტატისტიკის შესახებ მიაწვდიან ინფორმაციას.
მათივე ცნობით, დამსწრე საზოგადოება საჰაერო ბუშტებზე გამოსახავენ წითელ ე.წ. „რიბონს“ (შიდსის ლოგოტიპი წითელი ბაფთა) და ჰაერში გაუშვებენ. ასევე, დეკორატიულ სანთლებს აანთებენ და გამოსახავენ იმავე „რიბონს“.
„ჩვენ გვახსოვს, ჩვენ ვმოქმედებთ, ჩვენ ვცხოვრობთ აივ-თან ერთად“ 2022 წელს მსოფლიოში ამ დევიზით აღინიშნება შიდსით გარდაცვლილთა ხსოვნის საერთაშორისო დღე, რომელიც მოგვიწოდებს, არ შემოვიფარგლოთ მხოლოდ დაღუპულთა მოგონებებით, არამედ მნივნელოვანია საზოგადოების ყველა ფენა აქტიურად ჩაებას მოქმედებაში აივ/შიდსის პროფილაქტიკის, მკურნალობის და შიდსთან ასოცირებული სხვა პრობლემების გადასაწყვეტად.
დღეს აივ-თან ერთად თითქმის 38 მილიონი ადამიანი ცხოვრობს, შიდსით გარდაცვლილთა საერთაშორისო დღე წარმოადგენს მნიშვნელოვან პლატფორმას გლობალური სოლიდარობისთვის; არღვევს სტიგმისა და დისკრიმინაციის ბარიერებს და აძლევს ჯანმრთელი მომავლის იმედს ახალ თაობებს.
საქართველოში, უკანასკნელ წლებში, აღინიშნება აივ/შიდსით ავადმყოფების სიკვდილობის შემცირება, რაც მნიშვნელოვნად არის დაკავშირებული არვ თერაპიით მათი მოცვის გაუმჯობესებასთან, მკურნალობის და მოვლის პროგრამების ეფექტურ მუშაობასთან. შიდსით გამოწვეული სიკვდილობა ჩვენს ქვეყანაში ძირითადად განპირობებულია აივ გვიანი დიაგნოსტიკით”,- აღნიშნულია გავრცელებულ ინფორმაციაში.