საქართველოში იმპორტირებული ხახვის წილი 75%-მდე გაიზარდა, ხოლო ხახვის წლიური წარმოება ქვეყანაში, 2014-დან 2021 წლამდე, ანუ ბოლო 8 წლის განმავლობაში, საშუალოდ, 1,1 ათასი ტონით შემცირდა. ამის შესახებ EastFruit-ის ანალიტიკოსების ანგარიშში წერია.

პორტალის მონაცემებით, იმპორტი, დაახლოებით, 0,7 ათასი ტონით გაიზარდა, ექსპორტი კი მეტად დაბალია და არ იზრდება.

ბოლო 4 წლის (2018-2021წწ) განმავლობაში ხახვის წარმოება, წინა 4 წლის (2014-2017წწ) ჯამურ ოდენობასთან შედარებით, 34%-ით შემცირდა, ხოლო იმპორტი ანალოგიური პერიოდების შედარების დროს 53%-იან ზრდას აჩვენებს. ამ პერიოდში წარმოება 19 ათასი ტონით შემცირდა, იმპორტი კი 43 ათასი ტონით გაიზარდა. იმპორტმა როგორც ადგილობრივი წარმოების შემცირება, ასევე, გაზრდილი მოთხოვნა აანაზღაურა.

საქართველოში ხახვის ორი ძირითადი მწარმოებელი რეგიონია, სადაც ახალ სეზონს, რომელიც ივნისში იწყება, არაერთგვაროვნად მოელიან. ქვემო ქართლს მთლიანი წარმოების, დაახლოებით, 35% უკავია, ხოლო შიდა ქართლში ქართლი ხახვის ნახევარი იწარმოება. EastFruit-ის ცნობით, ორივე რეგიონის ფერმერები აღნიშნავენ, რომ 2021/2022 წლების სეზონი წარმატებული არ იყო, რასაც იაფი იმპორტით გამოწვეულ დაბალ ფასებს აბრალებენ.

პოზიტიურ ცვლილებებს ქვემო ქართლში არც ახალ სეზონზე მოელიან. წარმოება, სავარაუდოდ, 2021 წლის მაჩვენებელს ჩამორჩება, რადგან ფერმერები აცხადებენ, რომ დათესილი ფართობი ნაკლებია. რეგიონში ბოლო წლებში ხახვის წარმოება საგრძნობლად შემცირდა, რადგან ამჟამინდელ კლიმატურ პირობებში ძვირი ჯდება, ხოლო იაფ იმპორტთან კონკურენცია სულ უფრო რთულდება.

ქვემო ქართლისგან განსხვავებით, შიდა ქართლის ფერმერები ვარაუდობენ, რომ კოვიდპანდემიის შემდეგ მომხმარებელთა მოთხოვნის აღდგენის გამო, ახალი სეზონი ბევრად უკეთესი იქნება. EastFruit-ის ინფორმაციით, შიდა ქართლში ხახვის ფართობები გაიზარდა, თუმცა ზუსტი მონაცემები არ არსებობს. პორტალის ანალიტიკოსები ახალ სეზონზე შიდა ქართლში წარმოების ზოგად ზრდას, რომელიც მთლიან სურათს რადიკალურად შეცვლიდა, ნაკლებად მოელიან.

ვაჭრობის მონაცემებით, წელს იმპორტირებული ხახვი, წინა წლის ანალოგიურ პერიოდთან შედარებით, დაახლოებით, 10%-ით ძვირია. ამის მიზეზად EastFruit გაზრდილ სატრანსპორტო ხარჯებსა და მთავარ მომწოდებელ ქვეყანაში, თურქეთში ინფლაციის ზრდას ასახელებს. პორტალის შეფასებით, უფრო ძვირი იმპორტი ქართველ ფერმერებს გარკვეულწილად დაეხმარება, თუმცა სამეწარმეო ხარჯები საქართველოშიც იზრდება. ანალიტიკოსები ვარაუდობენ, რომ ქართველი ფერმერების წარმატება დიდწილად მოხმარების ზრდაზე იქნება დამოკიდებული.

წყარო: "ბიზნესპრესნიუსი"