„ქართული ოცნების“ წარმომადგენლებმა უპასუხეს უკრაინის ეროვნული უშიშროებისა და თავდაცვის საბჭოს მდივნის ალექსეი დანილოვის მოწოდებას, დნესტრისპირეთმა და საქართველომ დაიწყონ დაკარგული ტერიტორიების დაბრუნება.

სახელისუფლებო გუნდის წევრები ამბობენ, რომ საქართველო არასდროს გადაუხვევს სამშვიდობო პოლიტიკას მიუხედავად იმისა, რომ „ნაციონალური მოძრაობა“, უკრაინის ხელისუფლებაში მოქმედ მხარდამჭერებთან ერთად ცდილობენ ქვეყნის „ომში ჩათრევას.

საქართველოს პარლამენტის თავდაცვისა და უშიშროების კომიტეტის თავმჯდომარე ირაკლი ბერაია სოციალურ ქსელში წერს, რომ გარკვეული სუბიექტები, ქვეყანაშიც და მის ფარგლებს გარეთაც, დაინტერესებული არიან, ცდილობენ და ყველაფერს აკეთებენ საომარი მოქმედებების გეოგრაფიული არეალის გასაფართოებლად და საქართველოს ომში ჩასათრევად“.

ირაკლი ბერაიას შეფასებით, ამის გაჟღერება უკრაინის უშიშროების საბჭოს მდივნის მხრიდან, ქართული მხარისთუს  მიუღებელი და შოკისმომგვრელია.

უკრაინის უშიშროების საბჭოს მდივანს უპასუხა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ,  მიხეილ სარჯველაძემაც, რომლის განმარტებით,  ახლა საქართველოსთვის ომის დაწყების მოწოდებას არ აქვს არავითარი გამართლება და მიზეზი. სარჯველაძე დარწმუნებულია, რომ ამის უკან „ნაციონალურ მოძრაობა“ დგას.

"ამ შემთხვევაში, გაშიშვლდა რეალური მოტივაცია გარკვეული უკმაყოფილებებისა, რომელიც ისმოდა და უკავშირდებოდა საქართველოს. ვგულისხმობ იმას, რომ რეალური მიზეზი უკმაყოფილებებისა, არა სანქციები და განცხადებები იყო, არამედ, როგორც ჩანს, მოტივაცია სწორედ ამას უკავშირდებოდა, იქნებ რამენაირად საქართველო ჩაერთოს სამხედრო ავანტიურაში და შესაბამისად, ამ გზით თითქოსდა, რაიმე დახმარება აღმოუჩინოს უკრაინას. სინამდვილეში, ძალიან მნიშვნელოვანია ითქვას, რომ არავითარ დახმარებას არ გამოიწვევს ეს უკრაინისთვის და უბრალოდ, არასწორია. მეორე, რაც არანაკლებ მნიშვნელოვანია, მგონია, რომ არავითარი გამართლება და მიზეზი არ შეიძლება ჰქონდეს ახლა საქართველოსთვის ომის დაწყების მოწოდებას, რომელსაც ყველაფერი შეგვიძლია დავარქვათ, გარდა ერთისა, ეს ნამდვილად არ არის საქართველოს ინტერესში - ეს შეგვიძლია მკაფიოდ ვთქვათ. დიახ, რა თქმა უნდა, „ნაციონალურ მოძრაობას“ სამწუხაროდ, ჰქონდა მოტივაცია, რომ საქართველოში გაჩაღდეს ომი. ამისთვის მუშაობდნენ, ამისთვის იღვწოდნენ და სამწუხაროდ, ამას მხარდამჭერები ჰყავდა სწორედ უკრაინის ხელისუფლებაში, როგორც ჩანს. რეალურად, არავითარი შედგების, არავითარი დახმარების, არავითარი შეღავათის მომტანი, ეს უკრაინისთვის არ იქნება“, - აცხადებს სარჯველაძე.

უკრაინის ეროვნული უშიშროებისა და თავდაცვის საბჭოს მდივნის ალექსეი დანილოვის განცხადება შეაფასა უმრავლესობის წევრმა გია ცაგარეიშვილმაც. მისი აზრით, არის პირდაპირი მოწოდება, საქართველო რაიმე ფორმით ჩაერთოს უკრაინაში მიმდინარე სისხლისმღვრელ ომში და იმ უბედურებაში, რასაც ახლა პუტინის რუსეთი ატრიალებს უკრაინის ტერიტორიაზე.

ცაგარეიშვილის თქმით, ამან ცხადად ხილული გახადა მცდელობა, როგორმე ე.წ. მეორე ფრონტი გაიხსნას საქართველოში.

„რბილად რომ ვთქვათ, ცოტა გასაკვირი განცხადებაა, მით უმეტეს პარტნიორი ქვეყნის მაღალი თანამდებობის პირის მხრიდან, ადამიანის მხრიდან, რომელიც ანგარიშს უნდა უწევდეს ყოველ თავის ნათქვამს, მოსაზრებას, განსაკუთრებით ანგარიშს უნდა უწევდეს ამ მოსაზრებებს, რომელიც გამოთქმულია მის მიერ პარტნიორი ქვეყნის მიმართ, იმგვარი მეგობარი ქვეყნის მიმართ, როგორიც დღეს საქართველოა უკრაინისთვის. ამან ერთგვარად ხილული გახადა მცდელობა ძალიან ბევრი ადამიანისა თუ პოლიტიკური ორგანიზაციისა, მათ შორის საქართველოში, მიმართული იქითკენ, რომ როგორმე ჩვენი ქვეყანა ჩაერთოს ამ კონფლიქტში და ე.წ. მეორე ფრონტი, როგორც ბატონმა დანილოვმა აღნიშნა, როგორმე გაიხსნას საქართველოში“, - ამბობს გია ცაგარეიშვილი.