საქართველოში ნახშირის ერთადერთმა მწარმოებელმა „საქნახშირმა“ 2021 წელი 8.62 მილიონი ლარის ზარალით დაასრულა. უფრო დიდზარალიანი იყო კომპანიისთვის 2020 წელი, ორი წლის წინ „საქნახშირმა“ 26.59 მილიონი ლარი იზარალა.
გასულ წელს კომპანიას შემოსავალი 12.8 მილიონი ლარით, 25.7 მილიონამდე გაიზარდა. კომპანიაში 1200 ადამიანია დასაქმებული, რომელთა ხელფასებზეც 2021 წელს 21,23 მილიონი ლარი დაიხარჯა.
„საქნახშირის” აქტივები შეადგენს 13 მილიონ ლარს, ხოლო კომპანიის კაპიტალი შეადგენს - 84 მილიონ ლარს, რაც წლების განმავლობაში დაგროვილი 106 მილიონიან ზარალის შედეგია. კომპანიის მთლიანი ვალდებულებები 97.6 მილიონ ლარია.
„2021 წლის 31 დეკემბრის მდგომარეობით კომპანიის მოკლევადიანი ვალდებულებები (70,298,465 ლარი) მნიშვნელოვნად აჭარბებს მოკლევადიან აქტივებს (10,353,638 ლარი), დაგროვილი ზარალი კი შეადგენს 106,091,674 ლარს. ამ გარემოებების გამო, კომპანიას ექმნება სერიოზული ლიკვიდურობისა და საოპერაციო რისკების პრობლემა, რაც იწვევს მნიშვნელოვან გაურკვევლობას და ეჭვქვეშ აყენებს მის უნარს, გააგრძელოს საქმიანობა, როგორც ფუნქციონირებადმა საწარმომ, რის გამოც კომპანიამ შეიძლება ვერ შეძლოს აქტივების რეალიზაცია და ვალდებულებების დაფარვა ჩვეულებრივი საქმიანობის პირობებში“, — აღნიშნულია ანგარიშებში.
შპს “საქნახშირი“ დაფუძნდა 2006 წლის 27 აპრილს. კომპანიას 2019 წლის 27 სექტემბერს შეეცვალა მფლობელი (ჰოლდინგი საქართველოს ინდუსტრიული ჯგუფი) და კაპიტალის 100%-იანი წილის მფლობელი გახდა შპს „სტიილ ინტერნეიშენელ ტრეიდინგ კომპანი“, აღნიშნული კომპანია წარმოადგენს კომპანიის შპს საქნახშირის 100%-იანი წილის მფლობელს 2021 და 2020 წლის 31 დეკემბრის მდგომარეობით. კომპანიის საბოლოო ბენეფიციარი მფლობელია გიორგი ჭელიძე. კომპანია მდებარეობს ქალაქ ტყიბულში და მისის ძირითადი საქმიანობაა ნახშირის მოპოვება, გადამუშავება (გამდიდრება) და რეალიზაცია.