ევროკავშირთან ასოცირების ხელშეკრულებით გათვალისწინებული ევროკავშირი-საქართველოს გეოგრაფიული აღნიშვნების ქვეკომიტეტის რიგით მე-5 შეხვედრა გაიმართა. ინფორმაციას საქპატენტი ავრცელებს.

„ჰიბრიდულ რეჟიმში გამართულ შეხვედრას საქართველოს მხრიდან ესწრებოდნენ საქპატენტისა და სხვადასხვა სამინისტროების წარმომადგენლები.

საქპატენტის თავმჯდომარის მოვალეობის შემსრულებელმა მანანა ფრუიძემ ევროკავშირის დელეგაციის წევრებთან განიხილა საქართველოს გეოგრაფიული აღნიშვნების სტატუსთან და დაცვასთან დაკავშირებული მნიშვნელოვანი საკითხები, ასევე ექვსი ახალი ქართული გეოგრაფიული აღნიშვნის, კერძოდ, ღვინის ხუთი ქართული დასახელების - „სალხინოს ოჯალეშის“, „წარაფის“, „ახმეტას“ (ახმეტის მწვანე), „ახოების“, „ბოლნისის“ და ასევე, „ნინოწმინდის თაფლის“ ევროკავშირის ტერიტორიაზე შესაძლო დაცვის მინიჭების საკითხი, ამჟამად ევროკავშირში მიმდინარე შიდა პროცედურების სტატუსი.

შეხვედრაზე მხარეებმა განიხილეს სხვადასხვა მნიშვნელოვანი საკითხი, წარმოადგინეს ინფორმაცია ქართული გეოგრაფიული აღნიშვნების სტატუსთან, დაცვასა და აღსრულებასთან დაკავშირებით, ასევე ევროკავშირსა და საქართველოში ახალ გეოგრაფიულ აღნიშვნებთან დაკავშირებული შიდა პროცედურების შესახებ. შეხვედრაზე ასევე განიხილეს გეოგრაფიული აღნიშვნების სისტემის შესახებ საკანონმდებლო და სტრატეგიული მიმართულებების სიახლეები.

საუბარი შეეხო, ესტონურ ბაზარზე ევროკავშირის მხრიდან ქართული გეოგრაფიული აღნიშვნის - „სულგუნი“უფლებების ეფექტიანად აღსრულების საკითხს, ასევე გეოგრაფიული აღნიშვნების მიმართულებით განხორციელებულ წარმატებულ პროექტებს. შეხვედრაზე ქვეკომიტეტის წევრებს გააცნეს ევროკავშირის მიერ დაფინანსებული - TWINNING პროექტის შედეგები, რომლის ფარგლებში შეძენილი გამოცდილება და მიღებული ცოდნა არსებითად დაეხმარება საქართველოში გეოგრაფიული აღნიშვნების სისტემის განვითარებას. გარდა ამისა, მხარეებმა გაცვალეს ინფორმაცია ევროკავშირის ინტელექტუალური საკუთრების უწყების (EUIPO) გეოგრაფიული აღნიშვნების ექსპერტიზის ინსტრუმენტის „GI View“-ს ბაზაში ქართული გეოგრაფიული აღნიშვნების წარმატებით ინტეგრაციის შესახებ.

ევროკავშირი-საქართველოს გეოგრაფიული აღნიშვნების ქვეკომიტეტი შექმნილია ასოცირების შეთანხმების 179-ე მუხლის შესაბამისად, რომელიც მონიტორინგს უწევს შეთანხმების განხორციელებას გეოგრაფიული აღნიშვნების სფეროში და ასრულებს თანამშრომლობისა და დიალოგის ფორუმის ფუნქციას გეოგრაფიულ აღნიშვნებთან დაკავშირებით“ – ნათქვამია ინფორმაციაში.