საქართველოში ალკოჰოლური სასმელების ერთ-ერთმა უმსხვილესმა მწარმოებელმა სს „სარაჯიშვილმა“ 2022 წლის პირველი ნახევარში - 8.6 მლნ ლარის საერთო მოგება მიიღო, ხოლო წმინდა მოგებამ 3.7 მლნ ლარი შეადგინა. შესაბამისად საანგარიშო პერიოდში საერთო მოგების მარჟა 53%, ხოლო წმინდა მოგების მარჟა 23% დაფიქსირდა. 2021 წლის 6 თვის პერიოდთან შედარებით წმინდა მოგება 1.6-ჯერ, ხოლო საერთო მოგება 1.3-ჯერ შემცირდა.

2022 წელს 6 თვეში სს სარაჯიშვილის და შვილობილი კომპანიის მიერ რეალიზებული პროდუქციის ღირებულებამ 16,2 მლნ. ლარი შეადგინა. ეს მაჩვენებელი 26%-ით ჩამორჩება 2021 წლის 6 თვის გაყიდვებს. 2018 და 2019 წლებში შემოსავლები პროდუქციის რეალიზაციიდან დინამიურად იზრდებოდა, ხოლო 2020 წელს COVID-19 პანდემიასთან დაკავშირებით მოხდა რეალიზაციის შემცირება. 2021 წელს COVID-19 პანდემიის უარყოფითი ეფექტის შესუსტების შედეგად მოხდა შემოსავლების მცირედით ზრდა.

2022 წლის 6 თვის მონაცემებით, ჯგუფის გაყიდვებში 33% ადგილობრივ, ხოლო 67% საექსპორტო ბაზრებს ეკავა. საანგარიშო პერიოდში ჯგუფის პროდუქცია 16 საექსპორტო ქვეყანაში იყო წარმოდგენილი. 2022 წლის 6 თვეში ოთხი უმსხვილესი საექსპორტო ბაზარი იყო: ბელარუსი, რუსეთი, უკრაინა და ყაზახეთი. ამ ქვეყნების საერთო წილმა ექსპორტის 92% შეადგინა.

მომზადებულ დოკუმენტში ვკითხულობთ, რომ „სს სარაჯიშვილი და შვილობილი კომპანიების შემოსავლების 84%-ზე მეტი საექსპორტო ბაზრებზე მოდის, სადაც დიდი წილი პოსტსაბჭოთა ქვეყნებს უკავიათ. ბოლო წლების განმავლობაში ამ ქვეყნების ეკონომიკური მდგომარეობა არ იყო მდგრადი. ადგილი ქონდა მთლიანი შიდა პროდუქტის ზრდის მკვეთრ ცვლილებებს, ეროვნული ვალუტების დევალვაციას, ინფლაციას, უმუშევრობის დონის მერყეობას და ა.შ. მათი ეკონომიკური მდგომარეობის გაუარესება მკვეთრად აისახება ს.ს. სარაჯიშვილის და მის შვილობილ კომპანიის გაყიდვების დინამიკაზე. ამ გარე ფაქტორის თავიდან ასაცილებლად კომპანია მუდმივად მუშაობს დივერსიფიცირების მიმართულებით, რაც ახალი, ურთიერთდამოუკიდებელი ბაზრების მოძიებაში მდგომარეობს“.