საერთაშორისო სარეიტინგო სააგენტო S&P Global-მა საქართველოს ეკონომიკური ზრდის პროგნოზი 4%-დან 8%-მდე გაზარდა. სააგენტოს ინფორმაციით, ზრდის მიზეზი ომის შედეგად ქვეყანაში მიგრანტების შემოდინებაა, რაც ტურიზმის აღდგენას უზრუნველყოფს. 2023 და 2024 წლების პროგნოზი კი, შესაბამისად, 3% და 4.5%-ია.
სარეიტინგო სააგენტო Fitch-ის ერთი თვის წინ გაკეთებული შეფასებით, წელს საქართველოში ძლიერი შიდა და საგარეო მოთხოვნის, ასევე გაზრდილი ტურიზმისა და ქვეყანაში შემოსული ათასობით მიგრანტის ფულადი გზავნილის გამო მაღალი ეკონომიკური ზრდა იქნება. ორგანიზაციის პროგნოზით, 2022 წლის ზრდა, სავარაუდოდ, 10.9% იქნება. ამასთან, ზრდა 2023 წლისთვის 5.3%-მდე, ხოლო 2024 წლისთვის 4.7%-მდე უნდა შემცირდეს.
ეკონომისტი აკაკი ცომაია „კომერსანტთან“ ამბობს, რომ სარეიტინგო კომპანიების პროგნოზი ხშირ შემთხვევაში ოპტიმისტურია და 1.5%-ის ფარგლებშია ცდომილება.
„სარეიტინგო კომპანიები უყურებენ გრძელვადიან ტრენდს და მიმდინარე პროცესებს ეკონომიკაში, თუმცა დღევანდელ დღეს პროგნოზების გაკეთება რთულია, რადგან გაურკვევლობის ფაქტორი ძალიან მაღალია და რთულია იმაზე საუბარი თუ რამდენით გაიზრდება ქვეყნის მშპ. ჩვენი ეკონომიკური ზრდის ტრენდი მნიშვნელოვნად დამოკიდებული არის რუსეთის ფაქტორზე, რადგან მოთხოვნა ძირითადად ხდება რუსეთის მოქალაქეებისგან, ამიტომ ჩვენ არ ვიცით მაგალითად რამდენი აქვთ მათ დარჩენილი შემოსავალი, როგორ წავა რუსეთში მდგომარეობა, ამდენად რაიმეს პროგნოზირება რთულია, ასევეა სარეიტინგო კომპანიების შემთხვევაშიც. როდესაც ასეთი ორგანიზაციები აქვეყნებენ პროგნოზებს, ისინი ძირითადად ოპტიმისტურია და 1%-1.5%-შია ხოლმე ცდომილება“, — ამბობს აკაკი ცომაია.
ანალიტიკოსი და ეკონომიკის მეცნიერებათა დოქტორი ნიკა შენგელიაც „კომერსანტთან“ ამბობს, რომ სარეიტინგო კომპანიის პროგნოზი გადაჭარბებულია.
„მოლოდინი გადაჭარბებულია. ზოგადად ყველასთვის ცნობილია, რომ სარეიტინგო კომპანიებს პოლიტიკური დანიშნულებაც აქვს ზოგ შემთხვევაში. თუმცა, ეკონომიკური ზრდა რამდენიც არ უნდა იყოს, ინფლაცია უფრო მეტია და ის „გვიჭამს“ მთლიან ზრდას. რეალური ინფლაცია 30%-მდეა თუ ავიღებთ პირველადი მოხმარების საქონელსა და მომსახურებას, რასაც სტატისტიკა აქვეყნებს ეს არის საშუალო მაჩვენებელი, მოსახლეობას კი სწორედ ის პირველადი მოხმარების პროდუქტების ფასები აწუხებს, ვიდრე სხვა დანარჩენი“, — ამბობს ნიკა შენგელია.
საქართველოს სტატისტიკის ეროვნული სამსახურის მონაცემებით, 2022 წლის პირველ 7 თვეში ქვეყნის ეკონომიკის ზრდის საშუალო მაჩვენებელი 10.3%-ია, უშუალოდ ივლისში ზრდის მაჩვენებელი კი 9.7%-ს შეადგენს. რაც შეეხება ქვეყნის შიგნით არსებული ფინანსური ინსტიტუტების მოლოდინებს, საქართველოს ეროვნული ბანკი წელს ქვეყნის ეკონომიკის 9%-ით გაზრდას პროგნოზირებს.