2022 წლის განმავლობაში სარფის საბაჟო-გამშვები პუნქტით 5 080 728 ადამიანმა ისარგებლა. ინფორმაციას ამის შესახებ თურქული მედია ავრცელებს.
თურქული მედია სარფის საბაჟო-გამშვები პუნქტს თურქეთის ერთ-ერთი ყველაზე მნიშვნელოვან სახმელეთო სასაზღვრო კარიბჭეს უწოდებს, რომლის მეშვეობითაც ის კავკასიასა და ცენტრალურ აზიას უკავშირდება.
თურქული მხარის მონაცემების თანახმად სარფის საბაჟოს გავლით საქართველოდან თურქეთში 2 519 913 ადამიანი შევიდა, თურქეთიდან საქართველოში კი 2 560 815 შემოვიდა.
2021 წელთან შედარებით, თურქეთში შემსვლელთა რაოდენობა 454 %-ით, გამსვლელთა კი 407,5 %-ით გაიზარდა.
ყველაზე მეტი მგზავრი დეკემბერში დაფიქსირდა, თურქეთში 335 541 შევიდა და საქართველოში კი 356 172 გადმოვიდა.
გაიზარდა ასევე სატვირთო და მსუბუქი ავტომობილების და ავტობუსების ტრანზიტები. გასულ წელს სარფის სასაზღვრო კარიბჭე სულ 725 496 ავტომობილმა გაიარა, საქართველოდან თურქეთისკენ 329 271 ავტომობილი გადავიდა და თურქეთიდან საქართველოსკენ კი 396 225.
კომერციული მიზნით მოძრავი სატვირთო ავტომობილებისა და ავტოცისტერნების რაოდენობამ 368 520 შეადგინა.
2021 წელთან შედარებით, სატვირთო ავტომობილებზე საშვების გაცემის რაოდენობა 3%-ით, ავტობუსებზე 244%-ით, ხოლო მსუბუქ ავტომობილებზე 340%-ით არის გაზრდილი.
თურქული მედიის ცნობით, საბაჟო კონტრაბანდის წინააღმდეგ ბრძოლის ფარგლებში, 138 119 727 ლირის ღირებულების სხვადასხვა სახის პროდუქცია იქნა ამოღებული. კონტრაბანდის ფაქტებთან დაკავშირებით 175 პირის მიმართ იქნა საქმე აღძრული, ჯამში 12 021 000 ლირის ოდენობის ადმინისტრაციული ჯარიმა იქნა დაკისრებული.
ხოფის რაიონის მმართველმა გურქან უჩუნჯუმ „ანადოლუს“ კორესპონდენტს განუცხადა, რომ სარფის საბაჟო-გამშვები პუნქტი პანდემიამდელ მონაცემს დაუბრუნდა.
სარფი
