სან-ფრანცისკოს სასამართლოს ნაფიცმა მსაჯულებმა Tesla-ს დამფუძნებელი ელონ მასკი, რომელსაც 2018 წელს Twitter-ში გამოქვეყნებული პოსტის გამო თაღლითობაში ედებოდა ბრალი, გაამართლეს. მას ამის შესახებ CNN-ი იტყობინება.

გადაწყვეტილებას Twitter-ში ელონ მასკი გამოეხმაურა.

„მადლობა ღმერთს, ხალხის სიბრძნემ გაიმარჯვა. მე ღრმად ვაფასებ, რომ ნაფიცმა მსაჯულებმა „ტესლა-420“-ის საქმეზე უდანაშაულობა დაადგინეს“, - წერს მასკი.

საქმე ეხებოდა 2018 წელს ელონ მასკის მიერ სოციალურ ქსელ Twitter-ში გამოქვეყნებულ განცხადებას, სადაც ის წერდა, რომ მან „უზრუნველყო დაფინანსების“ მოძიება ელექტრომობილების მწარმოებელი კომპანიის პრივატიზაციისთვის. ამ ტვიტის შემდეგ კომპანიის აქციები გაძვირდა, თუმცა რამდენიმე დღეში მათი ფასი კვლავ დაეცა, როდესაც ცნობილი გახდა, რომ გარიგება არ შედგებოდა. ამ ორმა სიტყვამ განაპირობა ის, რომ აღმასრულებელი დირექტორი იძულებული გახდა პოსტი დაეტოვებინა და მილიონობით დოლარიანი ჯარიმები და იურიდიული მოსაკრებლები გადაეხადა.

მოსარჩელეები აცხადებდნენ, რომ ამ ტვიტის შემდეგ, აქციების ფასის ცვალებადობის გამო, ინვესტიციის მნიშვნელოვანი ნაწილი დაკარგეს და მასკს ზიანის ანაზღაურებას სთხოვდნენ. თუმცა, ნაფიცმა მსაჯულებმა დაადგინეს, რომ მათ თავიანთი პრეტენზიები მასკისა და სხვა მოპასუხეების წინააღმდეგ ვერ დაადასტურეს.