„ნათლად ჩანს, რომ იან მალკოლმ ჰოქს მითითებული საფუძვლითაც აქვს უფლება, სარჩელი წარადგინოს და მოსთხოვოს ხაზარაძესა და ჯაფარიძეს, ზიანი აუნაზღაურონ ბანკს, განსაკუთრებით მაშინ, როცა ბანკის უფლებამოსილი პირები შეგნებულად თუ შეუგნებლად უარს ამბობენ, ბანკმა აინაზღაუროს განცდილი ზიანი და გაიზარდოს მისი კაპიტალი“ , - ამ სიტყვებით ეხმაურება „თიბისი ბანკის“ ბრიტანელი აქციონერის იან მალკოლმ ჰოქის ადვოკატი დიმიტრი ტორაძე ბანკის ქართველი აქციონერების მამუკა ხაზარაძისა და ბადრი ჯაფარიძის ადვოკატის ზვიად კორძაძის განცხადებას, რომლის თანახმად კორძაძე აცხადებს, რომ ჰოქი არ არის სათანადო მოსარჩელე, რადგან ის არა „თიბისი ბანკის“ , არამედ „თიბისი PLC-ის“ აქციონერია.
დიმიტრი ტორაძის განმარტავს, თუ რატომ აქვს იან მალკოლმ ჰოქს უფლებამოსილება, მიმართოს ქართულ სასამართლოს მამუკა ხაზარაძის, ბადრი ჯაფარიძის და სხვათა მიმართ ზიანის ანაზღაურების მოთხოვნით:
„სარჩელში ცალკე თავად გვაქვს განსჯადობა და ჩამოყალიბებული გვაქვს ყველა ის დებულება, თუ რატომ მივმართავთ ქართულ სასამართლოს. იან მალკოლმ ჰოქი უფლებამოსილია, მიმართოს ქართულ სასამართლოს მამუკა ხაზარაძის, ბადრი ჯაფარიძის და სხვათა მიმართ ზიანის ანაზღაურების მოთხოვნით, იმიტომ, რომ აქ არის სარჩელის ორი მომენტი, დერივაციული და დელიქტური სარჩელი. როცა ზიანზე ვსაუბრობთ, ზიანის მიმყენებელი პირები არიან საქართველოს რეზიდენტი კომპანიები და საქართველოს ფიზიკური პირები და ვის სასარგებლოდაც ზიანი უნდა ანაზღაურდეს, იან მალკოლმ ჰოქი პირდაპირ ვერ მოითხოვს, რომ მე მომეცით, ის ითხოვს „თიბისი ბანკის“ სასარგებლოდ, „თიბისი ბანკიც“ არის ქართული რეზიდენტული კომპანია. შესაბამისად, მოპასუხეთა ადგილმდებარეობის მიხედვით, განსჯადობა აბსოლუტურად ზუსტია და ჩვენ მივმართეთ ქართულ სასამართლოს.
აქ არის კიდევ ერთი საინტერესო მომენტი, გასული წლის დეკემბერში ქართულმა სასამართლომ მიიღო „თიბისის“ აქციონერების სარჩელი, რომლის დედააზრია, რომ „თიბისი PLC“ იყოს საერთოდ გარიცხული „თიბისის“ აქციონერებიდან. ძალიან მაინტერესებს, ამ შემთხვევაში მამუკა ხაზარაძე სად იქნება? ჩვენი მოწინააღმდეგე იქნება, თუ ამ სარჩელის ფარგლებში უკვე სოლიდარული ჩვენი მხარე იქნება? როცა ვსაუბრობ დელიქტურ და დერივაციულ სარჩელზე, ერთი არის იანი და მეორე არის, როცა კომპანია არ იქცევა სწორად. ჩვენ ჯერჯერობით ამ გზას გვერდს ვუვლით და „თიბისის“ ვუტოვებთ ყველა გზას და საშუალებას, რომ ეს შესაძლებლობა მან გამოიყენოს. მეტიც, თვითონ აიღოს ხელში სადავეები, თვითონ დაიწყოს საკუთრივ ინტერესები, რადგან ეს პირდაპირპროპორციულად ნიშნავს ჩემი მარწმუნებლის და მისნაირი აქციონერების ინტერესების დაცვას“, - განმარტავს ტორაძე.
(R)