არასამთავრობო ორგანიზაცია „ინფორმაციის თავისუფლების განვითარების ინსტიტუტმა“ (IDFI) ჯანდაცვის სექტორის მიმოხილვა გამოაქვეყნა.
მიმოხილვაში მოცემულია სექტორის მაკრო მიმოხილვა; ჯანდაცვის სექტორის ძირითადი მაჩვენებლები და სხვა ქვეყნებთან შედარება; საცალო ფარმაციის სექტორის, ჰოსპიტლების და კლინიკების ფინანსური მაჩვენებლები; სახელმწიფოს ხარჯვა ჯანდაცვის სერვისებზე და აღწერილია არსებული გამოწვევები.
მათ შორის როგორც IDFI-ს მიმოხილვაშია აღნიშნული, ბოლო ხუთი წლის განმავლობაში ჯანდაცვის სექტორში ფასები მკვეთრად გაიზარდა. კერძოდ, მედიკამენტების ფასები 64%-ით გაიზარდა 2021 წელს, 2016 წელთან შედარებით. ამბულატორიული მომსახურება 35%-ით, ხოლო ჯანმრთელობის დაზღვევა 31%-ით გაძვირდა, ანალოგიურ პერიოდში. სტაციონარული მომსახურება შედარებით ნაკლები ინფლაციით ხასიათდება, თუმცა საანგარიშო პერიოდში ისიც 11%-ით გაძვირდა.
ამასთან, როგორც ანგარიშშია მოცემული, 2021 წელს შინამეურნეობების საშუალო ხარჯმა საცალო ფარმაციის ბაზარზე და ჯანდაცვის სექტორში 161 ლარი და 96 ლარი შეადგინა. ერთი ოჯახის ყოველთვიური დანახარჯი საცალო ფარმაციის ბაზარზე საშუალოდ 16%-ით იზრდებოდა ბოლო ხუთი წლის განმავლობაში და 161 ლარი შეადგინა 2021 წელს. შინამეურნეობების ხარჯები ასევე ზრდადია ჯანდაცვის მომსახურებაზე. კერძოდ, საანგარიშო პერიოდში ზრდა წლიურად საშუალოდ 7% იყო და 2021 წელს 96.1 ლარს მიაღწია.
წყარო: "ბიზნესპრესნიუსი"