მიმდინარე წელს საქართველოში რთველის მასობრივი სუბსიდირება არ მოხდება. როგორც ღვინის ეროვნული სააგენტოს ხელმძღვანელმა ლევან მეხუზლამ „კომერსანტთან“ განაცხადა, ამ ეტაპზე საბოლოო გადაწყვეტილება მიღებული არ არის, თუმცა ნაწილობრივი სუბსიდირების სხვადასხვა სქემები განიხილება.

მისი თქმით, წელს სავარაუდოდ, დაფინანსება შეეხება მხოლოდ თეთრ ყურძენს, რადგან სასპირტე მიმართულება, რომელშიც ის გამოიყენება, საკმაოდ მძიმე კრიზისშია.

„ჯერჯერობით რთველის სუბსიდირების ზუსტ ფორმაზე შეთანხმება არ მომხდარა, ამ ეტაპზე განიხილება მხოლოდ თეთრი ყურძნის სუბსიდირება და დიდი ალბათობით არ მოხდება წითელი ყურძნის. დღესდღეობით ჩვენთვის მთავარი საექსპორტო პროდუქტი არის წითელი ღვინო, ამიტომ გვაქვს მოლოდინი, რომ როგორც გასულ წლებში, ისე მიმდინარე წელსაც წითელი ღვინის მიმართულებით არ ჩავერიოთ და შევინარჩუნოთ თავისუფალი ბაზარი, სადაც მოთხოვნა-მიწოდება არეგულირებს მთლიანად თამაშის წესებს, თუმცა როგორც მას ჩვევია ფასის რყევები შესაძლოა იყოს. ნახევარი წლის ექსპორტის მონაცემები თითქმის ანალოგიურია რაც შარშან იყო, ამიტომ ისევე როგორც 2021 წელს არ მოგვიწია ჩარევა ალბათ წელსაც ისე იქნება. 

თეთრი ყურძენი, არის სასპირტე მიმართულება, არსებულ დღევანდელ რეალობაში ანუ ომის გამო ეს სეგმენტი ყურძნისეული ექსპორტის შემცირებიდან გამომდინარე საკმაოდ მძიმე კრიზისშია. შესაბამისად, აუცილებლად დაგვჭირდება მთავრობის ჩარევა, მათ შორის, სუბსიდიის მიმართულებით“,- აღნიშნა ლევან მეხუზლამ.

2021 წელს მთავრობამ რთველზე ჯამში 138 მილიონი ლარის სუბსიდია გასწია. სუბსიდიის მიზეზად შარშან ჭარბი მოსავალი და გლობალური პანდემია დასახელდა.