სასტუმრო „პარაგრაფ შეკვეთილის“ შემოსავალი გასულ წელს 153%-ით გაიზარდა და მან 35 მილიონ ლარს მიაღწია (2020 წელს 13.8 მლნ ლარი). ფინანსური ანგარიშგების მიხედვით, „პარაგრაფ შეკვეთილმა“ 2021 წელი 1.8 მილიონი ლარის მოგებით დაასრულა, მაშინ როდესაც 2020 წელს კომპანია 8.2-მილიონიან ზარალზე იყო.
სასტუმრო 2020 წლიდან ბიძინა ივანიშვილის საქველმოქმედო ფონდ „ქართუს“ საკუთრებაშია. სასტუმროს აქტივები 58 მილიონ ლარს შეადგენს, კომპანიის დაგროვილი ზარალი კი 205 მილიონი ლარია. 2021 წლის 31 დეკემბრისთვის, კომპანიის საწესდებო კაპიტალი უდრიდა 2,406 ათას ლარს. კომპანიაში აცხადებენ, რომ კაპიტალის 4,536 ათასი ლარით შემცირება წარმოადგენს მნიშვნელოვან მეწილეზე გაცემული სესხის საპირისპიროდ გაქვითვის არაფულად ტრანზაქციას.
ფინანსური ანგარიშის მიხედვით, გასულ წელს კომპანიის 35 მლნ ლარიანი შემოსავალის დიდი ნაწილი სასტუმროს ნომრებიდან (20.4 მლნ ლარი) და საკვებიდან (10.6 მილიონი ლარი) ამონაგები იყო.
სასტუმრომ გასულ წელს 7.1 მილიონის ადმინისტრაციული ხარჯები გასწია, ხოლო „პარაგრაფი შეკვეთილის“ მიერ მიწოდებული სერვისების თვითღირებულებამ 23.9 მილიონი ლარი შეადგინა.
2019 წლის 1-ელ აპრილს შპს პარაგრაფ შეკვეთილმა იჯარით აიღო ქონება მშობელი კომპანია შპს „ბლექ სი რიზორთსისგან“ და დაიწყო 220-ოთახიანი სასტუმროს ოპერირება Marriott International-თან ფრანშიზის ლიცენზიის შეთანხმების ფარგლებში. სასტუმრო ოპერირებს Marriott International-ის ლუქს ბრენდით, Autograph Collection-ით, რაც პირველი 5 ვარსკვლავიანი საერთაშორისო ლუქს სასტუმროა საქართველოში.
„საწარმო ძირითადად აქცენტს გააკეთებს გაყიდვების გაზრდასა და საოპერაციო მაჩვენებლების გაუმჯობესებაზე. 5 ვარსკვლავიან სასტუმროს აქვს შესანიშნავი ხედები შავი ზღვის სანაპიროზე, 400 მ 2 აკვარიუმი ზღვის იშვიათი ბინადრებით, 115 მეტრის სიგრძის ზღვაში შეჭრილი აუზი ზღვის გაფილტრული წლით, შიდა საცურაო აუზი, ზამთრის დახურული ბაღი ეგზოტიკური მცენარეებით, კაფეები, ბარები, 7 თემატური რესტორანი, სპა და მაგნიტური ქვიშების საპროცედურო. ასევე აქვს საბავშვო კლუბი, გიგანტური ტოპოგანი, ჩოგბურთის მოედანი, სპორტული მოედნები და კინო თეატრი. სასტუმრო აერთიანებს საინტერესო თანამედროვე დიზაინს, უნიკალურ და ექსტრავაგანტულ თვისებებს და უმაღლესი სტანდარტების შესაბამის მომსახურებას,”- ნათქვამია კომპანიის ანგარიშში.