სასტუმრო „პარაგრაფი“ შეკვეთილში 15 ივლისს გაიხსნება, ამის შესახებ „კომერსანტს“ სასტმროს მენეჯერმა თამუნა ჯიჯიხიამ განუცხადა. „პარაგრაფში“ სარემონტო სამუშაოების გაჭიანურების გამო სეზონის გახსნა ჩვეულებრივზე გვიან მოხდება.
„რადგანაც 15 ივლისამდე ვერ ვიხსნებით, შესაბამისად, რეგულაციებსა და გეგმებზე ასევე სამუშაო სტრატეგიაზე კონკრეტულად ვერაფერს ვიტყვით. ჩვენთან სარემონტო სამუშაოები მიმდინარეობს - გავზარდეთ პარკინგის მხარე და დავაგეთ ბავშვებისთვის ბალახი, სწორედ ამის გამო გაჭიანურდა პროცესები. კონკრეტული გეგმა პოსტპანდემიურ სიტუაციაში მუშაობისთვის მოგვიანებით გვექნება და გავაჟღერებთ,“-აცხადებს „პარაგრაფის“ მენეჯერი.
ფასებთან და რეგულაციებთან დაკავშირებული ცვლილებები მოგვიანებით გახდება ცნობილი, თუმცა სასტუმრო „პარაგრაფ რეზორტი და სპა შეკვეთილში“-ს ნომრების ფასი 654 ლარიდან იწყება და 3000 ლარსაც აღწევს.
სასტუმრო „პარაგრაფი“ შეკვეთილში 2017 წელს გაიხსნა. „Marriott International“-მა 2018 წლის საუკეთესო „ფრენჩაიზის“ სასტუმროების ნომინაციაზე შეკვეთილში მდებარე სასტუმრო „პარაგრაფი“ ევროპის 300 სასტუმროს შორის პირველ ადგილზე დაასახელა.
„პარაგრაფ რეზორტი და სპა შეკვეთილში“ საქართველოს თანაინვესტირების ფონდის პორტფელში ერთ-ერთი პირველი პროექტია, ტურიზმისა და უძრავი ქონების მიმართულებით. 220 ნომრიან სასტუმროში თავმოყრილია 1600 მ³ მოცულობის აკვარიუმი, 115 მ-ზე ზღვაში შეჭრილი აუზი, ბავშვთა გასართობი სივრცეები, ზამთრის ბაღი, მასშტაბური საკონფერენციო დარბაზები და რესტორნები. პროექტის ჯამური საინვესტიციო მოცულობა 100 მლნ აშშ დოლარს აჭარბებს. ამასთანავე, აღსანიშნავია, რომ „პარაგრაფ რეზორტი და სპა შეკვეთილში“ პირველი სასტუმროა, რომელიც „Marriott“-ის ქსელის „Autograph Collection“-ის ბრენდის სტატუსით ოპერირებს საქართველოს ბაზარზე. 2020 წლის ბოლომდე კი თბილისში, თავისუფლების მოედანზე (ყოფილი ცეკავშირის შენობის ადგილზე) და თაბორის ქედზე კიდევ ორი სასტუმროს გახსნაა დაგეგმილი, რომლებიც Marriott-ის ქსელის Autograph Collection-ისდა Luxury Collection-ის ბრენდების სტატუსით დაიწყებენ ოპერირებას.
მარიამ მორგოშია