საქართველოში სასტუმროების ფასების ინდექსი 2022 წლის სექტემბერში, 2022 წლის აგვისტოსთან შედარებით, 5.3%-ით შემცირდა, მათ შორის 3, 4 და 5 ვარსკვლავიანი სასტუმროების ფასების ინდექსი 5.8%-ით, ხოლო საოჯახო ტიპის სასტუმროების ფასები 4.3%-ით შემცირდა. ინფორმაციას, PMC კვლევითი ცენტრი აქვეყნებს.

ტურიზმის ყოველთვიური მიმოხილვის მიხედვით, თვიური ინდექსი ყველაზე მაღალი შიდა ქართლში (20.5%) აღმოჩნდა, ყველაზე ნაკლები კი გურიასა (-30.6%) და აჭარაში (-19.5%). 2022 წლის სექტემბერში, 2021 წლის სექტემბერთან შედარებით, სასტუმროების ფასების ინდექსი 22.6%-ით გაიზარდა, მათ შორის 3, 4 და 5 ვარსკვლავიანი სასტუმროების ფასების ინდექსი 19.0%-ით, ხოლო საოჯახო ტიპის სასტუმროების ფასები 41.3%-ით გაიზარდა. წლიური ინდექსი ყველაზე მაღალი იყო შიდა ქართლსა (28.4%) და აჭარაში (27.8%), ყველაზე ნაკლები კი მცხეთა-მთიანეთში (3.9%).

„2022 წლის სექტემბერში, საქართველოში 3- ვარსკვლავიანი სასტუმროების საშუალო ფასმა8 177 ლარი შეადგინა, ხოლო 4-ვარსკვლავიანი სასტუმროების საშუალო ფასმა - 287 ლარი. საოჯახო ტიპის სასტუმროების9 საშუალო ფასმა სექტემბერში 115 ლარი შეადგინა. . 5-ვარსკვლავიან სასტუმროთა საშუალო ფასმა სექტემბერში 440 ლარი შეადგინა. კახეთში ამ ტიპის სასტუმროებში, სტანდარტული 2-ადგილიანი ნომრის საშუალო ფასმა 580 ლარი შეადგინა, აჭარაში - 489 ლარი, გურიაში - 454, ხოლო თბილისში - 434“, — აღნიშნულია მიმოხილვაში.

აღსანიშნავია, რომ საერთაშორისო ვიზიტების ნაწილობრივი აღდგენის მიუხედავად, 2022 წლის I კვარტალში საერთაშორისო ვიზიტორების მთლიანმა დანახარჯმა პანდემიამდელ მაჩვენებელს მნიშვნელოვნად, 21%-ით, გადააჭარბა, ხოლო 2022 წლის II კვარტალში დანახარჯები 2019 წლის II კვარტლის მაჩვენებელს მხოლოდ 6%-ით ჩამორჩებოდა. ვიზიტზე საშუალო დანახარჯი 2019 წლის შესაბამის პერიოდებთან შედარებით 2022 წლის I კვარტალში სამჯერ გაიზარდა, ხოლო 2022 წლის II კვარტალში თითქმის გაორმაგდა. ეს აიხსნება იმით, რომ 2022 წლის პირველ ნახევარში ვიზიტის საშუალო ხანგრძლივობა თითქმის გაორმაგდა და 3.8-დან 6.4 ღამემდე გაიზარდა.