ტურისტული ნაკადების აღდგენის და სეზონური მოთხოვნის შედეგად სასტუმროს შემოსავლები აჭარის საშუალო და დიდ სასტუმროებში აღდგა 2019 წლის დონის 125.0%-მდე, რაც 4.7%-იანი წლიური ზრდაა (პოს ტერმინალებით გადახდების მიხედვით). პოს ტერმინალებით გადახდები თბილისის საშუალო და დიდ სასტუმროებში 2019 წლის დონის 82.5%-მდე აღდგა, რაც 62.5%-იანი წლიური ზრდაა 2022 წლის ივნისში, ამის შესახებ GALT&TAGGART-ის კვირის მიმოხილვაშია აღნიშნული.
„Airbnb-იზე მოთხოვნის ზრდა 2022 წლის ივნისშიც გაგრძელდა და 2019 წლის ივნისის დონის 70.8% შეადგინა, რაც ტურიზმის აღდგენის დინამიკას ასახავს, როგორც წინა თვეში. ივნისში ასევე გაგრძელდა ქირის ზრდა, თუმცა წინა 2 თვესთან შედარებით ზრდის ტემპი შენელდა რაც მიგრანტების თავდაპირველი ეფექტის შემდეგ ბაზრის დასტაბილურების ტენდენციაზე მიუთითებს - უძრავი ქონების ქირის ინდექსი ივნისში წლიურად 60.7%-ით გაიზარდა წინა 2 თვეში დაახ. 68%-იანი ზრდის შემდეგ“, — აღნიშნულია მიმოხილვაში.
GALT&TAGGART საბაზისო სცენარით, 2022 წელს ტურიზმის შემოსავლების 85%-იან აღდგენასვპროგნოზირებს 2019 წელთან შედარებით, თუმცა მაისი-ივნისის შემოსავლების და მიგრანტების ეფექტის გათვალისწინებით, სრულ აღდგენასაც არ გამორიცხავს.
აღსანიშნავია, რომ 2022 წლის ივნისში საქართველოს 387,781 საერთაშორისო ვიზიტორი სტუმრობდა, რაც 164.4%-იანი წლიური ზრდაა და 2019 წლის დონის 53.3%-ია. ეს ზრდა ძირითადად განპირობებული იყო ტურისტების რაოდენობის ზრდით, რომელმაც 2019 წლის დონის 64.1% შეადგინა (წინა თვეში 62.3%). ერთდღიანი ვიზიტები მცირედით დაჩქარდა და 2019 წლის დონის 33.3% შეადგინა (წინა თვეში 28.6%), რაც განპირობებულია მეზობელ ქვეყნებთან სასაზღვრო რეგულაციების შემსუბუქებით. ყველაზე მეტი ვიზიტორი რუსეთიდან (ჯამურის 23.3%) შემოვიდა, შემდეგ მოდის თურქეთი (16.0%) და სომხეთი (16.0%). აღსანიშნავია, რომ ყაზახეთიდან, ბელარუსიდან და უზბეკეთიდან ჩამოსული ვიზიტორების რაოდენობამ 2019 წლის დონეს გადააჭარბა. ივნისში ტურიზმის შემოსავალმა პოსტ-პანდემიური პერიოდის მაქსიმუმს მიაღწია - 301.7 მილიონი აშშ დოლარი, რაც 3.8-ჯერ აღემატება წინა წლის მაჩვენებელს და 2019 წლის დონის 88.7%-ია (წინა თვეში 95.6%). აღსანიშნავია, რომ ტურისტული შემოსავლები ასევე მოიცავს მიგრანტების (რუსეთიდან, ბელარუსიდან, უკრაინიდან) დანახარჯებს. ჩვენი შეფასებით, საქართველოში 80,000-120,000 ვიზიტორი იმყოფება იმაზე ხანგრძლივი ვადით, ვიდრე ჩვეულებრივი ტურისტები. ტურიზმის შემოსავლების 22.7% მოდიოდა რუსეთზე 2022 წლის ივნისში, შემდეგ მოდის ევროკავშირის ქვეყნები (10.1%), ბელარუსი (9.3%) და თურქეთი (9.3%).