სასტუმრო და სარესტორნო ბიზნესისთვის 2021 წელს დაგროვილი ქონების გადასახადის განულებასთან დაკავშირებით მთავრობის გადაწყვეტილება მოულოდნელი აღმოჩნდა. სექტორის წარმომადგენლები ამბობენ, რომ ასეთი ლიბერალური შეღავათი ბევრ ბიზნესს დიდ დახმარებას გაუწევს ახალი პროექტების განვითარებისთვის, ნაწილს კი გაკოტრებისგან დაიცავს.
მიიღე ინფორმაცია უფრო სწრაფად „კომერსანტის“ Telegram-ზე.
,,კოპალა ჯგუფის“ დირექტორი კახაბერ ბუაძე „კომერსანტთან“ ამბობს, რომ ჯერ პანდემიისა და შემდეგ უკვე უკრაინის წინააღმდეგ რუსეთის მიერ დაწყებული ომის გამო ბიზნესმა დიდი დანაკარგი განიცადა და ქონების გადასახადის გასტუმრების რესურსიც ამოწურული ჰქონდათ, რის გამოც შეიძლებოდა სერიოზული პრობლემა შექმნილიყო და ზოგიერთი ობიექტი დროებით დაეხურათ კიდეც.
,,პანდემიის პერიოდში ხანგრძლივად იყო შეზღუდვები, ამან დარგი ძალიან დააზარალა. ბევრ კომპანიაში გაჩნდა ვალდებულებების გასტუმრებასთან დაკავშირებით პრობლემა. 2020 წელს ქონების გადასახადი გაგვინულდა და დიდი შეღავათი გაგვიწიეს. 2021 წლისთვის მსგავსი ნაბიჯის გადადგმას და ასეთი ლიბერალური შეღავათის დაწესებას ნამდვილად არ ველოდით. მადლობის მეტი არაფერი გვეთქმის“, - ამბობს ბუაძე და დასძენს, რომ შეზღუდვები მოხსნილია, მაგრამ ჯერ ადრეა საუბარი, რომ ბიზნესი ფეხზე დადგება, რადგან ბევრი კომპანია გაკოტრდა და ზოგიც ამ ეტაპს ახლა გადის.
,,ბოლო წლების განმავლობაში პანდემიასთან გვიწევდა გამკლავება და ახლა უკვე ეს ომი, რაც დიდი პრობლემაა. ასეთ დროს შეღავათი ძალიან მნიშვნელოვანია, დიდ დახმარებას გაგვიწევს. ჩვენ ფაქტობრივად უიმედო მდგომარეობაში აღმოვჩნდით და უკვე გადასახადსაც ვერ ვიხდიდით. თითქმის გადაწყვეტილი გვქონდა, რომ გადავადება მოგვეხდინა ან ინკასოს დაგვადებდნენ და ძალიან ცუდ მდგომარეობაში აღმოვჩნდებოდით. 2021 წელს 120 000 ლარის რაოდენობის დავალიანება დაგვიგროვდა. ეს ტვირთი მოგვეხსნა.
ტურისტული ინდუსტრიისთვის პრობლემასთან გამკლავება არ არის მარტივი, სასტუმროს 5 კორპუსს ვფლობთ, და არც ერთ მათგანში არ არის სახარბიელო მდგომარეობა. ამდენივეა რესტორანიც, აქ შედარებით უკეთესი მდგომარეობაა, სასტუმრო ბიზნესს ამ მხრივ უფრო გაუჭირდა“, - ამბობს ,,კომერსანტთან“ კახაბერ ბუაძე.
მისი თქმით, დიდი პრობლემაა კადრებთან დაკავშირებითაც, რადგან პანდემიის პერიოდში ბევრი სპეციალისტი წავიდა ქვეყნიდან, ზოგმაც საქმიანობის პროფილი შეცვალა და სექტორი ამ მხრივ დეფიციტს განიცდის.
შეგახსენებთ, რომ ტურისტული სექტორისთვის 2021 წლის ქონების გადასახადის ჩამოწერის შესახებ საქართველოს პრემიერ-მინისტრმა ირაკლი ღარიბაშვილმა 4 აპრილს მთავრობის სხდომაზე განაცხადა.
,,ჩვენ შევისწავლეთ სექტორში არსებული სიტუაცია, გამოწვევები, პრობლემები, რომელიც ამ სექტორს დაუგროვდა. ბუნებრივია, კოვიდის გამო ყველაზე მეტად ეს სექტორი დაზარალდა, მათ შორის, სასტუმრო და სარესტორნო ინდუსტრია მთლიანობაში და ამიტომ, 2021 წლის ქონების გადასახადს აღარ გადაიხდის ეს სექტორი. დეტალებზე კონკრეტულად მოგახსენებენ ეკონომიკისა და ფინანსთა მინისტრები და ვფიქრობ, ეს იქნება მნიშვნელოვანი დახმარება ამ სექტორისთვის“, - აღნიშნა პრემიერმა.
მარი ჩიტაია