მედიაჰოლდინგ „კვირას“ პრესკლუბში „თამბაქოს კონტროლის ცენტრის“ დირექტორმა, გიორგი მაღრაძემ სავაჭრო ობიექტებში გამოვლენილ დარღვევებზე ისაუბრა.
მაღრაძის თქმით, ბოლო 2 თვის კვლევის მონაცემები აჩვენებს, რომ თამბაქოს ახალი პროდუქტები, რომელიც ელექტრონულ სიგარეტს, გასახურებელ თამბაქოს პროდუქტებს მოიცავს, თითქმის ყველა მარკეტშია წარმოდგენილი, მათ შორის ისეთ ადგილებში, სადაც სიგარეტი არ იყიდება.
„მაგალითად, სამშენებლო მასალების მაღაზიების შესასვლელებში, მოლების ფოიეებში. დაახლოებით 80-85 %-ში ეს პროდუქტები განთავსებულია ღიად, ხილულად, რაც აკრძალულია, მოთავსებულია ტკბილეულთან, საღეჭ რეზინებსა და სხვა პროდუქტებთან ერთად, რაც კანონით დაუშვებელია. მოგეხსენებათ, თამბაქოს პროდუქტები დახურულ დახლში უნდა იყოს. მაღაზიებში რომ ვაკვირდებით ვითარებას: ჩვეულებრივი სიგარეტები კარგად დახურულ დახლებშია, მაგრამ ელექტრონული სიგარეტები ხშირად ხილულადაა განთავსებული,“ – აღნიშნა გიორგი მაღრაძემ.
მაღრაძის თქმით, თამბაქოს კონტროლის კანონის აღსრულების მონიტორინგი სხვადასხვა მიმართულებით მიმდინარეობს. ერთი მიმართულება საზოგადოებრივი თავშეყრის დახურულ სივრცეებში მოწევის ფაქტების დაფიქსირებაა, მეორეა ის, თუ როგორაა დარეგულირებული თამბაქოს პროდუქტებით ვაჭრობის საკითხები.
„მოწევასთან დაკავშირებით მოწმდება ისეთი დაწესებულებები, როგორებიცაა კაფე-ბარები და რესტორნები, სასტუმროები, საჯარო, საგანმანათლებლო, სამედიცინო დაწესებულებები, ყველა საზოგადოებრივი თავშეყრის სივრცე, სადაც თამბაქოს მოხმარება შეზღუდულია. თამბაქოს პროდუქტში მოიაზრება როგორც ჩვეულებრივი სიგარეტი, ასევე ელექტრონული მოწყობილობები, „ვეიპეპი“, აიქოსი, ჩილიმი და ნებისმიერი ის საშუალება, რომელიც გარკვეულ თამბაქოს პროდუქტს შეიცავს, კვამლს, ან ორთქლს წარმოქმნის.
მონიტორინგის ფარგლებში ვაკვირდებით, რა ხდება არა მხოლოდ ჩვეულებრივი სიგარეტის, არამედ ელექტრონული სიგარეტის მოხმარების კუთხითაც. საკმაოდ მაღალია კანონის აღსრულების დონე-დაწესებულებების დაახლოებით, 90 %-ზე მეტი იცავს. ვითარება შეიძლება განსხვავებული იყოს დაწესებულების ტიპების მიხედვით, მაგალითად, სასწავლო დაწესებულებებში კანონის დაცვა 98 %-ია. რაც არ უნდა გასაკვირი იყოს, სამედიცინოში 75%-ის ფარგლებშია, აქვთ გარკვეული სივრცეები, სადაც ეწევიან და კანონს არღვევენ.“ - აღნიშნა გიორგი მაღრაძემ.
მაღრაძემ ასევე განმარტა, რომ ბოლო პერიოდში ელექტრონული სიგარეტების მოწყობილობების, გასახურებელი თამბაქოს პროდუქტების მიმართ ისეთი დამოკიდებულება გაჩნდა, რომ თითქოს ეს პროდუქტი კანონის მოქმედების ქვეშ არაა და მისი მოხმარება დახურულ სივრცეებში, საზოგადოებრივი თავშეყრის ადგილებში დაშვებულია.
„ამას, ერთი მხრივ, ხელს უწყობს თავად თამბაქოს ინდუსტრიის მიზანმიმართული პიარი და საინფორმაციო მუშაობა. ავრცელებენ ინფორმაციას, რომ თითქოს, ასეთი პროდუქტები ჩვეულებრივ სიგარეტზე თავის დანებების საშუალებაა, თითქოს ნაკლებად უსაფრთხოა. როგორც ჩანს, დაწესებულებების ადმინისტრაციებშიც და მოსახლეობაშიც ის დამოკიდებულება, რომ თითქოს ასეთი პროდუქტების მოხმარება შეიძლება, სწორედ ამ კამპანიამ განაპირობა. ბოლო პერიოდში მონიტორინგის შედეგად ასეთი პროდუქტების მოხმარების რამდენიმე შემთხვევა კაფე-ბარებში, რესტორნებში, თუ სხვა დაწესებულებებში გამოვავლინეთ, რაზეც რეაგირება მოხდა.
რაც შეეხება ჯარიმებს: დაწესებულება ჯარიმდება 500 ლარით, განმეორების შემთხვევაში 1000 ლარით, მესამე და ყოველ მომდევნო ჯერზე ერთი წლის განმავლობაში 2 000 ლარით. ხოლო პირს რაც შეეხება, ის შესაბამისად 100, 200 და 300 ლარით ჯარიმდება. კიდევ ერთხელ ვიმეორებ – აქ მთავარი დამოკიდებულების საკითხია. ელექტრონული სიგარეტის მოხმარების ფაქტები რამდენჯერმე სკოლებშიც კი დავაფიქსირეთ, რაც ძალიან საგანგაშოა,“ – განაცხადა მაღრაძემ.