სატაცურზე მოთხოვნა მზარდია, როგორც ადგილობრივ ისე საექსპორტო ბაზრებზე.  „კომერსანტთან ქართულ ბაზარზე პოპულარული „ქართული სატაცურის“ მწარმოებელმა განაცხადა, რომ ბოლო წლების განმავლობაში ადგილობრივ ბაზარზე სატაცურზე დიდი მოთხოვნა გაჩნდა, განსაკუთრებით სეზონზე.

ფერმერის განმარტებით, სატაცურის აღების სეზონი მარტიდან ივლისის ჩათვლით პერიოდია და სეზონის დასაწყისში 1 კგ  პროდუქციის ფასი 30 ლარია და შემდეგ ეტაპობრივად ჩამოდის 15 ლარზე. 

ფერმერმა ცოლქ-ქმარმა მცხეთის რაიონის სოფელ ძალისში სატაცურის მეურნეობა წლების წინ გააშენეს და პროდუქციას ადგილობრივ ბაზარზე „ქართული სატაცურის“ სახელით ყიდიან.

თინა წამალაიძის განმარტებით, ის სეზონზე 5 ათას ტონამდე სატაცურს აწარმოებს, რომელსაც მთლიანად ადგილობრივ ბაზარზე ყიდის. 

5 ათას ტონა სატაცურს აწარმოებს წლის განმავლობაში კახეთში მდებარე კოოპერატივი „ოზაანი“, რომელმაც სატაცურის პლანტაციის ფართობი 6 ჰა-მდე გაზარდა და მომავალი სეზონისთვის უფრო მეტი მოსავლის მოლოდინშია.

“ოზაანის“ სატაცური ძირითადად ქსელურ მარკეტებში „აგროჰაბში“, “ნიკორაში“, „გუდვილში“, „კარფურში“ იყიდება.

სეზონის დასაწყისში კოოპერატივი სატაცურს 25-30 ლარად აბარებს. მზარდი მოთხოვნის ფონზე „ოზაანი“ პლანტაციის ფართობის ზრდას განაგრძობს და უახლოესი 3 წლის განმავლობაში სატაცურს მთლიანობაში 10 ჰა ფართობზე აწარმოებს.

კოოპერატივი „ოზაანი“ სატაცურს სიღნაღისა და დედოფლის წყაროს მუნიციპალიტეტში აწარმოებს. კოოპერატივი ფლობს ასევე სატაცურის სათბურს, სადაც მოსავლის აღებას 10 დღეში დაიწყებს.

კოოპერატივის მენეჯმენტი ამბობს, რომ სამომავლოდ ექსპორტს განიხილავს, თუმცა ეს პლანტაციების ზრდის და სათანადო რაოდენობის პროდუქციის მიღების შემდეგ გახდება შესაძლებელი.

მზარდია სატაცურის ექსპორტიც. საქსტატის მიერ გამოქვეყნებული ინფორმაციის მიხედვით, საქართველომ სატაცურის ექსპორტი 32%-ით გაზარდა. სტატისტიკური მაჩვენებლების თანახმად, 2022 წლის იანვარ-ივლისში საქართველომ 107.66 ათასი დოლარის ღირებულების 17.05 ტონა ახალი ან გაცივებული სატაცურის ექსპორტი განახორციელა, მაშინ როდესაც 2021 წლის ანალოგიურ პერიოდში ქვეყანამ უცხოეთის ბაზრებზე 81.92 ათასი დოლარის ღირებულების 12.88 ტონა სატაცური გაყიდა.

საქართველოში მოყვანილი სატაცურის ნომერ პირველი მომხმარებელი რუსეთია, სადაც მიმდინარე წელს მთლიანად ექსპორტირებული სატაცურის ნახევარზე მეტი, 9.59 ტონა  გადაზიდა.

ამ დროისათვის საქართველოში მოყვანილი სატაცურის საექსპორტო ბაზრებია: 

• რუსეთი - 9.59 ტონა;
• არაბთა გაერთიანებული საამიროები - 5.40 ტონა;
• ქუვეითი - 1.70 ტონა;  
• სომხეთი - 0.36 ტონა;

რაც შეეხება ბოლო წლების სტატისტიკას: 2029 წელს საქართველომ ექსპორტზე 5.93 ტონა სატაცური გაიტანა, 2020 წელს კი 9.50 ტონა, 2021 წლის განმავლობაში კი 13.24 ტონა სატაცური.