თბილისის სავიზიტო ბარათი უახლოესს მომავალში ახალ ფუნქციებს შეიძენს. დედაქალაქის მთავრობის მიერ მეორედ გამოცხადებული ინტერესთა გამოხატვა წარმატებით დასრულდა, შესაბმისად თბილისის სატელევიზიო კოშკზე ვიზიტორთა ცენტრი, პანორამული რესტორანი და გადასახედი მოეწყობა.
ხელშეკრულება თბილისის მთავრობას, შპს „საქართველოს ტელერადიოცენტრსა“ და შპს „კასს თაუერსს“ შორის მიმდინარე წლის 16 აგვისტოს გაფორმდა. პროექტის განხორციელების მიზნით კომპანიის ინვესტირებული თანხის ჯამური ოდენობა არანაკლებ $4 მლნ–ს უნდა შეადგენდეს.
როგორც „კომერსანტს“ თბილისის მერიაში განუცხადეს, პროექტი შედგება წინასამშენებლო, სამშენებლო და ოპერირების ფაზებისგან:
1. წინასამშენებლო ფაზა შეადგენს ჯამში 1 წელს და მოიცავს ტექნიკურ-ეკონომიკური კვლევისა და დეტალური პროექტის მომზადებას.
2. სამშენებლო ფაზა გაგრძელდება ჯამში დაახლოებით 2 წელსა და 6 თვეს და მოიცავს პროექტის მშენებლობის ნებართვ(ებ)ის მოპოვებასა და მშენებლობის დასრულებას/ექსპლუატაციაში მიღებას.
3. ოპერირების ფაზა მოიცავს გამარჯვებული პირის მიერ 25 წლის ვადით პროექტის პროფილის სრულად შენარჩუნებასა და ოპერირებას.
პანორამული რესტორანი განთავსებული იქნება 70 მეტრ სიმაღლეზე და 120-300 სტუმარს უმასპინძლებს.
ინტერესთა გამოხატვაში მონაწილეობა მხოლოდ ერთმა კომპანიამ მიიღო, რომელმაც მუნიციპალიტეტს პროექტის განხორციელება მაქსიმალური 1 000 000 ლარით თანამონაწილეობის პირობებით შესთავაზა. როგორც მერიაში აცხადებენ, ინტერესთა გამოხატვაში გამარჯვებულის გამოვლენის კრიტერიუმად განსაზღვრულ იქნა სწორედ ზემოხსენებულ თანხაზე ყველაზე ნაკლები ოდენობის შეთავაზება.
ამას გარდა, შპს „საქართველოს ტელერადიოცენტრი“ იღებს ვალდებულებას, ოპერირების პერიოდში უზრუნველჰყოს სატელევიზიო ანძის (გარდა საპროექტო ტერიტორიისა) მოვლა-პატრონობა და მიმდინარე რემონტის განხორციელება (განათება და შეღებვა) იმ სტანდარტითა და ხარისხით, როგორც ეს ხორციელდება დღესდღეობით.
თბილისის სატელევიზიო კოშკზე ვიზიტორთა ცენტრის, პანორამული რესტორნის, ე.წ. პანორამული გადასახედისა და სხვა შესაბამისი ინფრასტრუქტურის მშენებლობის, სარგებლობის ვადის 25 წელი განმავლობაში ოპერირებისა და შემდგომში მესაკუთრისთვის გადაცემის მიზნით, თბილისის მთავრობამ შპს „საქართველოს ტელერადიოცენტრთან“ ერთად, ინტერესთა გამოხატვა 2021 წლის 7 აპრილის გამოაცხადა.
პროექტი საერთაშორისო (ესტონური) საკონსულტაციო კომპანიის - „KOKO“-ს მიერ შემუშავებული კონცეფციისა და კვლევების შესაბამისად ხორციელდება, რომელსაც სხვადასხვა ქვეყანაში მსგავსი პროექტების განვითარების დიდი გამოცდილება აქვს.
შპს „კასს თაუერსი წარმოადგენს სს „კასს გრუპი“-ის ერთ-ერთ შვილობილ კომპანიას, რომელიც სხვადასხვა მსხვილ დეველოპერულ პროექტებს ახორციელებს, მათ შორის: KASS LAND - წალკის კანიონი • TsalkaCanyon-ს.
შპს „კასს თაუერსი“ მეწარმეთა და არასამეწარმეო იურიდიული პირების რეესტრში 2021 წლის 6 მაისს დარეგისტრირდა. კომპანიის დირექტორი და 30% წილის მფლობელი ეკატერინე თორდია. 70% „კასს ფორესტს“ ეკუთვის. თავის მხრივ „კასს ფორესტი“ 2019 წელს დარეგისტრირდა. კომპანიის დირექტორიც აქაც ეკატერინე თორდია, თუმცა წილის 100%-ს სს „კასს გრუპი“ ფლობს. სს „კასს გრუპი“ რეესტრში 2014 წელს დარეგისტრირდა, რომლის დირექტორიც ეკატერინე თორდიაა.
შეგახსენებთ, რომ თბილისის სატელევიზიო კოშკი, რომელსაც არასწორად უწოდებენ ტელეანძას, საკომუნიკაციო მიზნებისთვის აგებული დამოუკიდებლად მდგომი სტრუქტურაა. მისი მშენებლობა 1952 წელს დაიწყო და 1956 წელს დასრულდა. სიმაღლე 186 მეტრი იყო და ახლანდელი კოშკის მიმდებარედ იდგა. შედარებით მარტივი კონსტრუქციისგან შედგებოდა და ფერმული სტილის იყო. პირველი სატელევიზიო გადაცემა 1956 წლის 30 დეკემბერს გავიდა ეთერში. პირველი ფერადი მაუწყებლობა კი – მოგვიანებით, 1966 წელს. სტუდია, საიდანაც მაშინდელი დიქტორები ქვეყანას ახალ ამბებს ამცნობდნენ, ძველი კოშკის მიმდებარე ტერიტორიაზე იყო განლაგებული. ვინაიდან ძველ კოშკს სატელევიზიო არხების რაოდენობის გაზრდის საშუალება არ ჰქონდა, საჭირო გახდა ახალი კოშკის მშენებლობა. მისი მშენებლობა 1972 წელს დაიწყო და ორი წლის განმავლობაში მცოცავი ამწით მიმდინარეობდა. ახალი თანამედროვე კოშკი ექსპლუატაციაში შევიდა 1974 წლის 30 ნოემბერს, რის შემდეგაც მოხდა ძველი კოშკის დემონტაჟი და გადატანა ქალაქ გორში. დღეისათვის თბილისის სატელევიზიო კოშკი საქართველოში ყველაზე მაღალი ნაგებობაა, რომელიც მსოფლიოს ყველაზე მაღალი კოშკების სიაშია შეტანილი.
ბაჩო ადამია