2023 წლის პირველი კვარტლში, ბიზნეს კლიმატის მაჩვენებელი წინა კვარტალთან შედარებით გაუმჯობესდა და 46.8 ქულა შეადგინა, რაც კომპანიების მიერ ბიზნესის მიმდინარე მდგომარეობის დადებითად შეფასებით და ოპტიმისტური მოლოდინებით არის განპირობებული. ბიზნესის მიმდინარე მდგომარეობა ყველაზე დადებითად ვაჭრობის სექტორმა შეაფასა.
„კვადრუმ ჯორჯიას” მარკეტინგის ხელმძღვანელი თეიკო ლომინაძემ „კომერსანტთან“ აღნიშნა, რომ „ისთ ფოინთის“ ბრუნვების ზრდის დინამიკა ძირითადად ინფლაციით არის განპირობებული, თუმცა ომმა საქართველოს ვაჭრობის სექტორზე მოკლევადიანი პოზიტიური გავლენა მოახდინა.
„წინა წლის და მიმდინარე წლის პირველი კვარტლის მონაცემებით, ვხედავთ რომ ტენდენცია საკმაოდ მზარდია, მომხმარებლების კუთხით. ვხვდებით, რომ ეს რეგიონში შექმნილმა ვითარებამ განაპირობა და მომხმარებლების ასეთი ზრდის ტემპი მოკლევადიანი ეფექტია, თუმცა მთლიანობაში ტრენდი საკმაოდ პოზიტიურია.
2023 წლის პირველი კვარტალიც ძალიან კარგად დაიწყო, საცალო ვაჭრობაში ვხედავთ პოზიტიურ დინამიკას. პანდემიამდელ პერიოდთან შედარებით, როცა საკმაოდ კარგ ნიშნულზე ვიყავით, შეგვიძლია ვთქვათ, რომ სექტორმა აღდგენა დაასრულა.
სავაჭრო ცენტრის ბრუნვა გაზრდილია, თუმცა ეს ძირითადად ინფლაციით არის განპირობებული, აქედან გამომდინარე, ეს არ არის მეტი მომხმარებლით განპირობებული ან იმ ფაქტით, რომ მომხმარებლებს გაუუმჯობესდა ფინანსური მდგომარეობა, ის იყო გაზრდილი ფასებთან მიმართებით,“ - აღნიშნა თეიკო ლომინაძემ.