პარლამენტის გადაწყვეტილებით, მშენებლობის პროცესში გამწვანების კომპონენტის სავალდებულო წესით ინტეგრირება მთელი ქვეყნის მასშტაბით 2024 წლის პირველი იანვრიდან სავალდებულო ხდება. აღნიშნული რეგულაცია თბილისში 2019 წლიდან მოქმედებს.
რა პოზიცია აქვს ამ რეგულაციასთან დაკავშირებით სამშენებლო სექტორს - თემასთან დაკავშირებით „კომერსანტის“ ეთერში სამშენებლო კომპანია „არსის“აღმასრულებელმა დირექტორმა ბესო ორთოიძემ ისაუბრა.
„სტანდარტების არსებობა მნიშვნელოვანია ნებისმიერი სფეროს განვითარებისთვის, განსაკუთრებით უძრავი ქონების დეველოპმენტის სფეროსთვის. ბოლო წლებში ბევრი რეგულაცია მივიღეთ, რაც გამომდინარეობს იქიდან, რომ ჩვენი სტანდარტი უნდა დაუახლოვდეს ევროპულ სტანდარტს. აქ საუბარია იმაზე, რომ იყოს ერთიანი ხედვა იგივე რეკრეაციასთან დაკავშირებით. ანუ ავალდებულებს სახელმწიფო კომპანიას, თუ რა ხე-მცენარეები უნდა იყოს დარგული გამოყოფილ ფართობში. საქართველოს მასშტაბით ეს რეგულაცია ვერ იქნება ერთნაირი, სხვადასხვა კლიმატურ პირობების რეგიონში სხვადასხვა მცენარეების შერჩევა მოხდება, მაგრამ პრინციპები იქნება ერთიანი ყველა რეგიონისთვის,“ - განაცხადა ბესო ორთოიძემ. მისი თქმით, მნიშვნელოვანია ის რომ რეგულაციის შემოღებიდან გარკვეული პერიოდის გასვლის შემდეგ, გაანალიზებული იქნეს ამ რეგულაციების ხარვეზები და მოხდეს შესაბამისი შესწორებები.
ბესო ორთოიძის თქმით, არსებობს კითხვები იმასთან დაკავშირებით, თუ როგორ მოხდება რეგულაციის აღსრულება.
„კითხვის ნიშნები აღსრულების ნაწილში მაქვს, ჩვენი კომპანია არ აშენებს 1-2 კორპუსისგან შემდგარ კომპლექსს, რამდენიმე ათეული კორპუსია, შესაბამისად აქ დგას საკითხი, როდის უნდა მოხდეს კონკრეტული სკვერის მოწყობა. რა თქმა უნდა პირველივე სახლის დასრულების შემდეგ ვერ მოხდება, იმიტომ რომ მშენებლობის დროს ეს გამწვანებული სივრცე დაზიანდება და უნდა მოხდეს ბოლოს მოთხოვნა. თუმცა არაკეთილსინდისიერი კომპანიის შემთხვევაში, თუ ყველა კორპუსი დაასრულა და მიიღო ექსპლუატაციაში, შეიძლება აღარ მოხდეს სკვერის მოწყობა. აქ არის მოსაფიქრებელი გამოსავალი, რომ ერთის მხრივ ბიზნესი არ შეფერხდეს და არ მოგვიწიოს ტყუილად გაკეთება, რომელიც მერე დაზიანდება, მეორეს მხრივ სახელმწიფო არ აღმოჩნდეს ისეთ მდგომარეობაში, რომ კომპანიებმა გამწვანების კუთხით ვალდებულება არ შეასრულონ.
ყოველ 25 კვ.მ-ზე მოითხოვება ერთი ხე-მცენარის დარგვა და აქ ვაწყდებით პრობლემას. სკვერში მნიშვნელოვანია იყოს თავისუფალი სივრცე, მოედანი ბავშვებისთვის, ამიტომ გვიწევს ხე-მცენარეების ერთ ნაწილში თავმოყრა. რომელიც ფუნქციურად და მოსავლელად რთულია. ყველაზე მნიშვნელოვანია, რომ რეგულაციებს მივუბრუნდეთ და ვნახოთ პრაქტიკაში რა პრობლემებს წავაწყდებით და კორექტივები შევიტანოთ. თბილისის შემთხვევაში ეს მარტივად ხდება და კომუნიკაცია არის ადმინისტრაციასა და დეველოპერულ კომპანიებს შორის, მაგრამ არ ვიცი რეგიონების დონეზე როგორ მოხდება,“- აღნიშნა ორთოიძემ.
რაც შეეხება იმას, იმოქმედებს თუ არა რეგულაცია უძრავი ქონების თვითღირებულებაზე ბესო ორთოიძე ამბობს, რომ მათ შემთხვევაში -არა, რადგან კომპანია „არსი“ რეგულაციებამდეც, ზრუნავდა მათ საცხოვრებელ კომპლექსებში შესაბამისი მწვანე სივრცეების არსებობაზე. თუმცა, როგორც „არსის“აღმასრულებელმა დირექტორი ამბობს, მნიშვნელოვანია, რომ სტანდარტი ერთიანი იყოს ყველა კომპანიისთვის.