2021 წელს საქართველოში 469 ერთეული ვალუტის გადამცვლელი პუნქტი (კომერციული ბანკების, მიკროსაფინანსო ორგანიზაციებისა და ადგილობრივი ერთეულების გარეშე) ფუნქციონირებდა, რომლის 46.3% თბილისში, 25.8% - აჭარაში იყო განთავსებული. სავალუტო ჯიხურების მთლიანმა ბრუნვამ 6.4 მლრდ. ლარი შეადგინა, საიდანაც 51.8% - აშშ დოლარზე, 14.7% - ევროზე, ხოლო 33.5% სხვა ვალუტაზე გადანაწილდა. ინფორმაციას ამის შესახებ საქსტატი ავრცელებს.
მიიღე ინფორმაცია უფრო სწრაფად „კომერსანტის“ Telegram-ზე.
ვალუტის გადამცვლელი პუნქტების მიერ 2021 წელს 543.0 მლნ. აშშ დოლარი და 135.3 მლნ. ევრო იქნა შეძენილი. იმავე პერიოდში გაყიდული აშშ დოლარისა და ევროს მოცულობა კი შესაბამისად 520.5 და 132.0 მილიონს შეადგენდა.
2021 წლის განმავლობაში ვალუტის გადამცვლელმა პუნქტებმა მომსახურება 1.664 მლნ კლიენტს გაუწიეს, საიდანაც 1.651 მლნ ფიზიკური, ხოლო 13 ათასი - იურიდიული პირია. იმ ფიზიკური პირებიდან, რომელთაც გაეწიათ მომსახურება, 85.9% ადგილობრივი, ხოლო დანარჩენი 14.1% - უცხოელია.
2021 წელს სალაროში არსებული ნაღდი ფულის მოცულობა (კონვერტირებული ლარში) 29.7 მლნ. ლარით განისაზღვრა, რომლის 37.0% აშშ დოლარზე, 10.7% ევროზე, ხოლო 52.3% სხვა ვალუტაზე მოდის. ბანკებში არსებული ფულადი სახსრების მთლიანი მოცულობა (1.8 მლნ.) სრულიად ნაწილდება მხოლოდ რეზიდენტ ბანკებზე.