სავალუტო სესხებზე ანუ დოლარში და ევროში შესაძლოა პროცენტი გაიზარდოს, რაც შეეხება ლარს, ვიმედოვნებთ რომ რეფინანსირების განაკვეთი წელს დაიკლებს და ეს დადებითად აისახება ეროვნული ვალუტის სესხების განაკვეთებზე“, — ამის შესახებ საბანკო ასოციაციის პრეზიდენტმა ალექსანდრე ძნელაძემ „კომერსანტთან“ განაცხადა.

მისი თქმით, მიმდინარე წელს საპროცენტო განაკვეთების კუთხით რადიკალური ცვლილებები არ არის მოსალოდნელი, შესაძლებელია თანმიმდევრული ცვლილებები მოხდეს, რაც 1-1.5%-ზე მეტი არ იქნება.

„არამარტო საქართველოში, მსოფლიოშიც, ჩვენ არ უნდა ველოდოთ 2018-2019 წლის დროინდელ საპროცენტო განაკვეთებს. ინფლაციის მაჩვენებელი თებერვლის თვეში შემცირდა და ეროვნული ბანკის პროგნოზია, რომ 6%-მდე დაიწევს, ვიმედოვნებთ ეს ფაქტორი სებ-ს მისცემს საშუალებას, რომ მონეტარული პოლიტიკის განაკვეთი შეამციროს, რაც პირდაპირპროპორციულად ლარში საპროცენტო განაკვეთებზე დადებითად აისახება და შეამცირებს მას, მაგრამ ამასაც მხოლოდ ზაფხულის შემდეგ თუ უნდა ველოდოთ იმ პროგნოზებიდან გამომდინარე რასაც სებ-ი საუბრობდა.

რაც შეეხება უცხოურ ვალუტას, აქ საპროცენტო განაკვეთები შენარჩუნდება, შეიძლება მცირედი ზრდაც ვიხილოთ, რადგან ამერიკის ფედერალურმა რეზერვმა საკმაოდ მაღლა აწია განაკვეთი და მოლოდინი, რომ ეს არის მაქსიმალური განაკვეთი არ გვაქვს, მიუხედავად იმისა რომ ძალიან გაზრდილია. ევროშიც შესაძლოა ვიხილოთ მონეტარული განაკვეთის ზრდა და ესეც აისახება განაკვეთებზე.

გარდა ამისა, საქართველოში ლიკვიდობის მაღალი მაჩვენებელია, განსაკუთრებით უცხოურ ვალუტაში, პირველი შემთხვევაა როცა სადეპოზიტო პორტფელმა საკრედიტო პორტფელს მოცულობაში გაასწრო, რაც ერთგვარად იმის წინაპირობაა, რომ უახლოეს მომავალში ასე ვთქვათ აქტიური მოზიდვის აუცილებლობა არ ექნება საქართველოს საბანკო სისტემას და ამან შეიძლება მკვეთრი ნახტომები საპროცენტო განაკვეთებზე არ იქონიოს. თუ განაკვეთების ზრდა მოხდება, ეს თანმიმდევრული იქნება“, — ამბობს ალექსანდრე ძნელაძე.

მიმდინარე წლის იანვარში კომერციული ბანკების მიერ გაცემული სესხების მოცულობა (ბანკთაშორისი სესხების გარდა), წინა თვესთან შედარებით 317.70 მლნ ლარით (0.71%-ით) შემცირდა (გაცვლითი კურსის ეფექტის გარეშე, 0.08%-ით შემცირდა) და 44.47 მლრდ ლარი შეადგინა. ეროვნული ვალუტით სესხებზე საშუალო შეწონილი წლიური საპროცენტო განაკვეთი 0.8 პპ-ით 17%-მდე გაიზარდა, ხოლო უცხოური ვალუტით გაცემულ კრედიტებზე საპროცენტო განაკვეთი 1.2 პპ-ით შემცირდა და 7.4% დონეზეა.