სადაზღვევო სექტორის წარმომადგენლები სადაზღვევო პაკეტებზე ფასების 10-15%-იან ზრდაზე საუბრობენ. მათი მოლოდინით ინდუსტრიაზე ზეგავლენას ინფლაცია და გაზრდილი ხარჯი ახლაც ახდენს და ტარიფების მატება გაგრძელდება.

სადაზღვევო ასოციაციის ხელმძღვანელის დევი ხეჩინაშვილის თქმით, მოთხოვნა ამ სეგმენტში მეტნაკლებად შენარჩუნებულია, თუმცა მაღალი ინფლაციის გავლენა აისახა ტარიფებზე და დაზღვევა დაახლოებით 10%-ით გაძვირდა.

,,სადაზღვევო ინდუსტრიისთვის, როგორც ზოგადად ყველა ბიზნესისთვის, საკმაოდ რთული პერიოდია. თუმცა კლება არ გვაქვს, ეკონომიკური მდგომარეობა იმ ნაწილში, რომელიც ეზღვევა, შედარებით სტაბილურია. მიუხედავად იმისა, რომ სერვისები გაძვირდა, მიმაჩნია, რომ ეს არ არის ფასების მნიშვნელოვანი ზრდა იმასთან შედარებით, როგორი ცვლილებაც სამამხმარებლო კალათის მაჩვენებლებში აისახა. შეიძლება ითქვას, რომ სექტორში ჯერჯერობით სტაბილურობაა იმის მიუხედავად, რომ მოლოდინები მაინცდამაინც სახარბიელო არ არის. ინფლაციური ზეწოლა დიდია, ასევე სამედიცინო თვალსაზრისით, მნიშვნელოვანი გაძვირებაა, ამიტომ ბოლო ერთ წელიწადში 10%-ით გაძვირებული დაზღვევის პაკეტები, სავარაუდოდ კიდევ გაიზრდება“, - ამბობს დევი ხეჩინაშვილი.

სადაზღვევო პაკეტებზე, განსაკუთრებით კი ავტონაწილების გაძვირების ფონზე ავტოდაზღვევის მიმართულებით ფასების ზრდის შესაძლებლობას არ გამორიცხავენ სადაზღვევო კომპანიები. მათი უმეტესობა „კომერსანტთან“ ამბობს, რომ გასულ წელს 10-15%-ით გაზარდეს ფასები, თუმცა ეს არასაკმარისია ფასების სტაბილიზაციისთვის და მიმდინარე წელს გაძვირება კიდევ არის მოსალოდნელი.

„არდის” გენერალური დირექტორი მიხეილ ჯაფარიძე ადასტურებს, რომ წელს სავარაუდოდ ჯანმრთელობის დაზღვევისთვის საშუალო ფასების ზრდა 15% იქნება.

„დანახარჯები ინფლაციის გამო გაზრდილია, თუმცა როგორც წესი სამედიცინო დაზღვევაზე ფასების ზრდა მაინც ვერ ეწევა ინფლაციის ტემპს, რაც იწვევს ზარალების ზრდას. წელს სავარაუდოდ საშუალო ფასების ზრდა 15% იქნება ჯანმრთელობის დაზღვევისთვის, თუმცა რთულია იმის თქმა, თუ რამდენად საკმარისი იქნება ეს სადაზღვევო პაკეტების ფასების სტაბილიზაციისთვის“, — ამბობს მიხეილ ჯაფარიძე. 

2022 წლის 3 თვის განმავლობაში მოზიდულმა სადაზღვევო პრემიამ პირდაპირი დაზღვევის საქმიანობიდან შეადგინა 267,6 მილიონი ლარი. ამავე პერიოდის შედეგებით მზღვეველების სადაზღვევო მოგებამ შეადგინა 42,6 მილიონი ლარი, წმინდა მოგებამ კი 4,7 მილიონი ლარი.  საქართველოს მოსახლეობის 18 პროცენტი სარგებლობს კერძო სამედიცინო დაზღვევით, ასევე საქართველოში რეგისტრირებული ავტომობილების მხოლოდ 7 პროცენტია დაზღვეული. 2022 წლის 3 თვეში 668,017 სამედიცინო დაზღვევის პოლისი იყო მოქმედი. ავტოდაზღვევის კუთხით კი, 105,454 პოლისი იყო გაყიდული.

ნინო თამაზაშვილი