საწვავის გაძვირების გამო საგაზაფხულო სამუშაოების შესრულება მოსახლეობის დიდ ნაწილს გაუჭირდება. სპეციალისტები ფიქრობენ, რომ დარგი დიდწილად სუბსიდირებული უნდა გახდეს, რათა ხალხს ხარჯი შეუმსუბუქდეს. როგორც აგროექსპერტი პაატა აროშიძე ,,კომერსანტთან“ ამბობს, სახელმწიფოს სოფლის მეურნეობის ყველა პროგრამა უნდა ჩაირთოს, მათ შორის, ვაუჩერის მექანიზმი და საწვავის სუბსიდირება, რის გარეშეც ხვნა-თესვით სამუშაოებს გლეხების უმეტესობა ვერ გაუმკლავდება.
მიიღე ინფორმაცია უფრო სწრაფად ჩვენს Telegram-ზე.
,,საგაზაფხულო პერიოდი კარს მოგვადგა. სუბსიდირება ვაუჩერული სისტემის გამოყენება, ხვნა-თესვის პროგრამების ამოქმედება გახდება საჭირო. ეს თუ არ გაკეთდა, საკმაოდ დიდი კითხვის ნიშნის ქვეშ დგას საგაზაფხულო სამუშაოების ჩატარება. სწორედ ამ პერიოდში თუ არ მოხერხდა ძირეული სამუშაოები, დიდი ჩავარდნა გველის და მოსავლიანობაზეც აისახება. ამიტომ ყველა აგრარული პროგრამა უნდა გაგრძელდეს და საწვავის სუბსიდირებაც ჩაერთოს. არავინ ელოდა, რომ საწვავის ფასი ამ მასშტაბს მიაღწევდა. სამწუხაროდ, ვერც სახელმწიფო პროგრამები გადაჭრის ბოლომდე პრობლემას, მაგრამ ხელშემწყობი ეფექტი ნამდვილად ექნება. სოფლის მეურნეობა ნებისმიერ ქვეყანაში სუბსიდირებული დარგია და ამაზე ვერც საქართველო იტყვის უარს“, - ამბობს ,,კომერსანტთან“ პაატა აროშიძე.
გარდა საწვავისა, აგროექსპერტის თქმით, სერიოზულ პრობლემას ქმნის უამინდობა, ამიტომ სახელმწიფოს როლი მნიშვნელოვანია.
,,აგრარული სექტორი საკუთარი ძალებით ვერ შეძლებს განვითარებას, რადგან საბაზრო კანონებთან ერთად, ბუნების კანონზეც არის დამოკიდებული. გარემო პირობებმაც უნდა შეუწყოს ხელი. ასეთი გაჭიანურებული ზამთარი ძნელად მახსოვს, რაც პრობლემას შექმნის განსაკუთრებით იმ რეგიონებში, სადაც ყველაზე მეტი მიწაა დასამუშავებელი. ასეთია სამეგრელო, კახეთი, ქართლი და ნაწილობრივ აჭარისა და გურიის ზღვისპირეთის ტერიტორიები. მათზეა ძირითადად დამოკიდებული და მაქსიმუმი უნდა გაკეთდეს, რათა სასურსათო უსაფრთხოების გამოწვევას მეტნაკლებად გავართვათ თავი. აქცენტი გაკეთდეს სტრატეგიულ დარგებზე, როგორიცაა მემარცვლეობა, მაღალმთიან რეგიონებში - მეცხოველეობა და სხვა, რაც სურსათის წარმოებას გაზრდის, - აცხადებს აროშიძე.
შეგახსენებთ, რომ საქართველოში საწვავის ფასმა მორიგი ფსიქოლოგიური ნიშნული გადალახა. ზოგიერთ ქსელში დიზელის ღირებულებამ 4 ლარს გადააჭარბა, ზოგან კი ფასები 4.00 ლარიან ზღვარს მხოლოდ რამდენიმე თეთრით ჩამორჩება.
მარტის დასაწყისში ბარელი ნავთობის ფასმა 2008 წლის შემდეგ პირველად $130-ს გადააჭარბა, შემდეგ ცოტა დაიკლო, მაგრამ ახლაც $111 ღირს, რაც 2014 წლის შემდეგ ყველაზე მეტია, მაგრამ თუ 2014 წლის ივნისში ლარის კურსი დოლართან მიმართებაში 1.80-ზე ნაკლები იყო, ახლა 3.20-ს აჭარბებს.
მარი ჩიტაია