საქართველოს იანვარ-აპრილში გასული წლის ანალოგიურ პერიოდთან შედარებით საწვავის იმპორტში $140 მლნ-ით მეტის გადახდა მოუწია. ფასების მკვეთრი ზრდის ფონზე ნავთობპროდუქტების იმპორტის ღირებულება 71%-ით $197 მლნ-დან $337 მლნ-მლნ-მდე გაიზარდა.

საწვავი საკმაოდ არაელასტიური პროდუქტია. ფასის ზრდა მოხმარებას ვერ ამცირებს, ან ამცირებს, მაგრამ უმნიშვნელოდ. ნავთობპროდუქტების იმპორტიორთა ასოციაციის ცნობით იანვარ-აპრილში ბენზინისა და დიზელის იმპორტი 1.8%-ით 333.7 ათას ტონამდე შემცირდა.

მარტის პიკის შემდეგ, მსოფლიო ბაზარზე როგორც ნედლი ნავთობის, ასევე პლატსზე საწვავის ფასი მცირედით შემცირდა. ლარი კი დოლართან მიმართებაში უკვე 50 თეთრით გამყარდა. ამის მიუხედავად ტაბლოებზე ფასები არ შემცირებულა. ბრენდულ ავტოგასამართ სადგურებზე ყველაზე იაფი რეგულარის ტიპის ბენზინის ფასი 3.60 ლარიდან იწყება და 3.80 ლარამდე ადის. პრემიუმის ფასი 4.00 ლარს აღწევს, სუპერის 4.10-ს, დიზელის კი 4.15-დან იწყება და ზოგ შემთხვევაში 4.40-საც აჭარბებს. კონკურენციის სააგენტოს ცნობით აპრილში რუსეთიდან იმპორტირებულ რეგულარის ტიპის ბენზინზე ფასნამატი ლიტრზე 65 თეთრს აღწევდა.

საწვავის გაძვირება ნეგატიურ გავლენას მხოლოდ მგზავრობის ფასზე არ ახდენს. მიმდინარე ორნიშნა ინფლაციის ერთ-ერთი მიზეზი ტრანსპორტირების გაძვირებაცაა.