სახელმწიფო 4737707.49 აშშ დოლარად სპინალური კუნთოვანი ატროფიით დაავადებული პირებისათვის საჭირო 633 ფლაკონ ევრისდის (რისდიპლამი) შეიძენს. მსოფლიოს მასშტაბით მედიკამენტი ევრისდის წარმოების ექსკლუზიური უფლებამოსილება გააჩნია მხოლოდ კომპანია F.Hoffmann-La Roche Ltd-ს. გარდა ამისა, საქართველოს გონივრულ ტერიტორიულ ფარგლებში, კერძოდ, სომხეთსა და თურქეთში აღნიშნული მედიკამენტი არ არის რეგისტრირებული, ხოლო აზერბაიჯანში რეგისტრირებულია 2021 წლის 11 ნოემბრიდან, პროდუქტის იმპორტი ხორციელდება 2022 წლის აგვისტოდან.
კლინიკური მდგომარეობის მართვის სახელმწიფო სტანტარტის დოკუმენტიდან ირკვევა, რომ მსოფლიოში სპინალური კუნთოვანი ატროფიის სამკურნალოდ არსებობს მხოლოდ სამი მედიკამენტი:
ნუსინერსენი (სპინრაზა), Onasemnogene abeparvove (ზოლგენსმა) და რისდიპლამი (ევრისდი). ეს უკანასკნელი გამოიყენება 2 თვიდან ზემოთ, პერორალურად და მისი მიღება სახლის პირობებშიც შესაძლებელია. ამასთან, საქართველოს ბაზარზე რეგისტრირებულია მხოლოდ ევრისდი.
ამბულატორიულად სამართავად, ბინაზე მისაღებად გამოყენებადი მედიკამენტია მხოლოდ ევრისდი (რისდიპლამი, არაპატენტური საერთაშორისო დასახელება), დოზირებით 60მგ/80მლ (0.75მგ/მლ), შესაბამისად, მიზანშეწონილი ალტერნატივა მის ჩასანაცვლებლად არ არსებობს.