სახელმწიფომ დიღმის სასწავლო საცდელი მეურნეობის ტერიტორიაზე არსებული 12 003 კვ.მ. არასასოფლო–სამეურნეო დანიშნულების მიწის ნაკვეთი და მასზე განთავსებული შენობა-ნაგებობა გაასხვისა. 3 110 000 ლარად შეფასებული ქონება შპს „ალფამ“„100 საინვესტიციო შეთავაზება ბიზნესს“ კამპანიის ფარგლებში 3 115 000 ლარად უპირობოდ იყიდა. აქუციონში მონაწილეობა მხოლოდ ერთმა კომპანიამ მიიღო.
აუქციონის აღწერაში ვკითხულობთ, რომ საპრივატიზებო უძრავი ქონება წარმოადგენს ჭაობით დაკავებულ ტერიტორიულ მონაკვეთს. მის ნაწილზე განთავსებულია მიმდებარე ტერიტორიებიდან შემკრები სადრენაჟე არხი, ხოლო ნაკვეთის ნაწილზე ნაყარი მიწაა.
ახალმა მეპატრონემ თხრილის მიწით ამოვსების ნებართვის მოთხოვნით დედაქალაქის მთავრობას უკვე მიმართა. განმარტებით ბარათში, „ალფას“ წარმომადგენელი წერს, რომ ტერიტორიაზე წყალი გროვდება, რაც ადგილის დაჭაობებას იწვევს და ნაკვეთს ნებისმიერი მიზნით გამოუსადეგარს ხდის.
განცხადება არქიტექტურის სამსახურმა განიხილა, რის შემდეგაც „ალფას“ აცნობა, რომ მათ მიერ მითითებული ობიექტი არ ექცევა საქართველოს მთავრობის №255-ე დადგენილებით დამტკიცებული მშენებლობის ნებართვის გაცემის წესისა და სანებართვო პირობებით განსაზღვრულ იმ ობიექტთა/სამშენებლო სამუშაოთა ნუსხაში, რომელთა მშენებლობა, მონტაჟი/დემონტაჟისათვის კანონმდებლობით დადგენილი წესით გაიცემა მშენებლობის ნებართვა ან წერილობითი დასტური.
შპს „ალფა“ მეწარმეთა და არასამეწარმეო იურიდიული პირების რეესტრში 2021 წლის იავნარში დარეგისტრირდა. კომპანიის დირექტორი ირაკლი წიკლაურია, ხოლო 100 % წილის მფლობელი ტარიელ გიორგაძე. მის სახელს არა ერთი კომპანია უკავშირდება: შპს „ელ ჯორჯია“, შპს „ევრა“,შპს „ჯბს“, შპს „ანგი“.