მესაქონლეობის პროდუქტის გაძვირებასა და მწარმოებელი გლეხებისთვის ხელშეწყობის აუცილებლობაზე დიდი ხანია საუბრობენ ამ სექტორის წარმომადგენლები. ამჯერად საქმე ეხება სოფლის მეურნეობის პროდუქციის დეფიციტს, შემდგომში კი, შესაბამისად, მის გაძვირებას. ფერმერები ძირითადად საძოვრების სიმცირეს ჩივიან. როგორც „კომერსანტს“ ფერმერი მიშა ჩაფიძე უყვება, არის არაერთი შემთხვევა, როდესაც სოფლის მეურნეობის სხვადასხვა სახელმწიფო პროგრამებს პირები არაკეთილსინდისიერად იყენებენ - ყიდულობენ საძოვრებს სასოფლო დანიშნულებით, თუმცა ფერმის გაშენება იქ არ ხდება. აღნიშნულის კონტროლი არ მიმდინარეობს, გლეხს კი საქმის წარმოებაში ხელი ეშლება.
„ყველაზე სწორი იქნება ახლა გლეხს თუ შევუწყობთ ხელს, რომ აწარმოოს პროდუქცია ხარისხიანად და ხელმისაწვდომ ფასად. მივცეთ დაფინანსება, ხელი შევუწყოთ სესხებში, რომ გაძლიერდეს გლეხი. მე ვარ ერთგვარი შუამავალი, გარდა იმისა, რომ თავადაც ვაწარმოებ რძის პროდუქტს, გლეხისგან შევისყიდი და ვცდილობ, რომ არ გააფუჭონ, არ შეურიონ ფხვნილი და ნამდვილი რძისგან იყოს. მაგრამ, გლეხისთვის ძვირი ჯდება.
როცა გლეხი თავის
ფასში მომცემს პროდუქტს და მე მას ვყიდი, ბუნებრივია, ემატება ტრანსპორტირების საფასური.
როგორც კი დეფიციტი შეიქმნება, გლეხი ძვირს ითხოვს თავის პროდუქტში. მე წამოვიღე ნატურალური
პროდუქტი, მოეწონა მომხმარებელს და გაიყიდა, კიდევ წამოვიღე მოეწონა - უკვე დეფიციტი
გახდა. იძულებული ვხდები შევურიო სხვა ყველი,
რომლიც ქარხნისაა და ფხვნილზე მუშაობს. ამას თუ აკეთებ, ეს ბიზნესიც ფუჭდება და გლეხს
სახელი უფუჭდება.
სოფლის მეურნეობას
სჭირდება დახმარება. ბევრი ადამიანი დაუბრუნდება სოფელს, რომ იცოდეს, რომ იქ ხელს შეუწყობენ
და საქმე კარგად წარიმართება, შესაბამისად დაბალანსდება ყველაფერი. ახლა პირიქით, გამოდინებაა
სოფლიდან.
სოფელში არის საძოვრები, შემოვიდა ერთი პიროვნება შეისყიდა ეს საძოვრები მთლიანად, ვითომ ფერმას აკეთებს, გლეხი ჩაკეტა - ასეთი ფაქტები არ უნდა დაუშვას სახელმწიფომ, ყურადღება უნდა მიექცეს. სახელმწიფო პროგრამებს ცუდად იყენებს ერთეულები, ვითომ ფერმას აკეთებენ, გამოაქვთ სესხები და გლეხს ხელს უშლან. თითქმის ყველა სოფელშია ასეთი რამე და უნდა შემოწმდეს, კეთდება თუ არ კეთდება“, - გვიყვება მიშა ჩაფიძე.
ასოციაცია „მომავლის ფერმერის“ თავჯდომარემ რუსუდან გიგაშვილმა ცოტა ხნის წინ „კომერსანტთან“ მერძევეობის დარგზე და მასში არსებულ პრობლემებზე ისაუბრა.
როგორც გიგაშვილი ყვება, სექტორს ერთმანეთის მიყოლებით საკმაოდ ძლიერი მოთამაშეები ტოვებენ, რის მიზეზადაც ძირითადად რენტაბელურობის პრობლემა სახელდება. გიგაშვილი ამბობს, რომ საქართველოში პირუტყვის საკვები მთავარი პრობლემაა, რადგან მაღალპროდუქტიული ჯიშების წარმადობა მთლიანად პირუტყვის სწორ და დაბალანსებულ კვებაზე დგას. მისივე თქმით, საქართველოში ძალიან მწირი საკვები ბაზაა და ეს ყოველთვის ასე იყო და ტენდენცია კვლავ გრძელდება, განსაკუთრებით იმ ფონზე, როდესაც ქვეყანაში არსებული მიწის რესურსების ნახევარი სახელმწიფოს ხელში, ხოლო აუთვისებელი და გამოუყენებელი მიწის რესურსი სურათს უფრო ამძიმებს.
კომერსანტი