2025 წლის პირველი იანვრიდან ძალაში უნდა შევიდეს ახალი კანონი საჯარო შესყიდვების შესახებ. აღნიშნული კანონი დღეს უკვე არსებული სახელმწიფო შესყიდვების შესახებ კანონის ერთგვარი გაგრძელებაა, რომელმაც მთელი რიგი რეგულაციები ახლებურად და განსხვავებულად უნდა დაარეგულიროს.
როგორც რადიო „კომერსანტის“ ეთერში სახელმწიფო შესყიდვების სააგენტოს იურიდიული დეპარტამენტის უფროსმა გიორგი ლაცაბიძემ განაცხადა, კანონპროექტის ავტორების ამოსავალი იმ ვალდებულებების შესრულებაა, რომელიც ქვეყანამ ევროკავშირისგან ღრმა და ყოვლისმომცველი ხელშეკრულებისა და ასოცირების ხელშეკრულების ფარგლებში მიიღო.
„ამ ვალდებულების ფარგლებშიც 2016 წლის მარტში დავამტკიცეთ სამოქმედო გეგმა და ამ გეგმის შესაბამისად ვახორციელებთ რეფორმას. ახალი კანონით გვინდა, რომ უშუალოდ პრაქტიკულ საქმიანობაში ჩართულ პირებს, ანუ შემსყიდველ ორგანიზაციებს, და მიმწოდებლებს ყველა იმ სიკეთეზე პირდაპირი და უშუალო წვდომა ჰქონდეთ, რომელიც მოწინავე ევროპულ ქვეყნებშია დანერგილი. აქედან გამომდინარე, ჩვენი მიზანი ნათელია - თითოეული თეთრი მაქსიმალურად ღია და კონკურენტულ გარემოში უნდა დაიხარჯოს,“ - განაცხადა გიორგი ლაცაბიძემ.
გიორგის ლაცაბიძის თქმით, დღევანდელი კანონმდებლობით ტენდერში გამარჯვებულად გამოვლენის მხოლოდ ერთ მეთოდს ვიყენებთ. ეს არის დაბალი ფასი. ახალი კანონის მიღების შემდეგ, ტენდერში მონაწილე შეგვიძლია შევაფასოთ სხვა კრიტერიუმებითაც. ესენია: ფასის და ხარისხის კომბინაცია და შესყიდვის ობიექტის სასიცოცხლო ციკლის დანახარჯების ჯამური ოდენობა. ეს იმას ნიშნავს, რომ ჩვენ შეიძლება დღეს გადავიხადოთ ოდნავ მეტი თანხა, მაგრამ ამ შესყიდვის ობიექტის სასიცოცხლო ციკლის ფარგლებში გაცილებით ნაკლები დანახარჯი გავწიოთ და საბოლოო ჯამში, ბიუჯეტისთვის ეკონომიკურად გამართლებული შედეგი მივიღოთ.
კანონპროექტი წვრილი და საშუალო ბიზნესის წახალისებასაც ითვალისწინებს.
ახალი კანონის თანახმად, თუ ერთი პრეტენდენტი შემსყიდველი ორგანიზაციის სატენდერო მოთხოვნებს დამოუკიდებლად ვერ აკმაყოფილებს და მას სხვა რომელიმე პირის გამოცდილება სჭირდება, შეუძლია ის ქვეკონტრაქტორად აიყვანოს.
„ჩვენ შეგვიძლია თამამად ვთქვათ, რომ ახალი კანონპროექტი სრულ შესაბამისობაში იქნება იმ ევროდირექტივების ბოლო მოთხოვნებთან, რომლებიც საჯარო შესყიდვებს ეხება. რა თქმა უნდა, კანონში, ადგილობრივი ობიექტური საჭიროებიდან გამომდინარე, მცირე ჩარევები შევიტანეთ, პირდაპირ არ დაგვიკოპირებია. თუმცა, ეს ჩარევები ევროპული დირექტივების ძირითად მიზნებს და სულისკვეთებას არ ცდება. გარკვეულ დონეზე, ამ კანონპროექტთან დაკავშირებით, ევროკომიის შესაბამისი უფლებამოსილი პირების მხრიდან დადებითი დასკვნაც კი გვქონდა,“ აცხადებს გიორგი ლაცაბიძე.
მოამზადა მაკა ბიბილაშვილმა
სახელმწიფო შესყიდვების შესახებ კანონპროექტ
