სახელმწიფომ ერთ-ერთი წამგებიანი საწარმოს 100%-იანი წილი გაასხვისა. საქმე ეხება ბათუმში რეგისტრირებულ შპს „საზღვაო ტექსერვისს“, რომლიც 1 700 850 ლარად,  „100 საინვესტიციო შეთავაზება ბიზნესს“ კამპანიის ფარგლებში, შპს „საქართველომ“ შეისყიდა. საწარმოს გაყიდვას ეკონომიკის სამინისტრო 2019 წლიდან ცდილობს, თუმცა გამოცხადებული აუქციონი 4–ჯერ ვერ შედგა.

2019 წლის 5 აგვისტო - საწყისი ფასი 2 283 000 ლარი

2021 წლის 30 მარტი - საწყისი ფასი 2 263 800 ლარი

2021 წლის 28 აპრილი - საწყისი ფასი 2 263 800 ლარი

21021 წლის 31 მაისი - საწყისი ფასი 2 263 800 ლარი

4 წარუმატებელი მცდელობის შემდეგ საწარმო 2021 წლის 22 ივნისს გაიყიდა. აუქციონის საწყისი ფასი 1 697 850 ლარი იყო, ხოლი ვაჭრობის ბიჯის ღირებულება 5 000 ლარს შეადგენდა. აუქციონის ერთადერთი პრეტენდენტი შპს „საქართველო“ იყო.

საწარმოს ძირითადი საქმიანობა საქართველოს პორტების კუთვნილი მცურავი საშუალებების, ჰიდროტექნიკური დანადგარების, ამწე მოწყობილობებისა და სხვა ტექნიკა დანადგარების შეკეთება და ტექნიკური მომსახურებაა. შპს „საზღვაო ტექსერვისი“ მომსახურებას პორტებში შემომავალ უცხო ქვეყნის გემებსაც უწევდა.

კომპანიამ  8835 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებულ შენობა-ნაგებობები პირობების გარეშე იყიდა.

2021 წლის 1–ლი აპრილის  მდგომარეობით, კომპანიის აქტივები 1 708 677  ლარია. ვალდებულებები  5 522  ლარი, ხოლო კომპანიის საკუთარი კაპიტალი 1 703 155 ლარის შეადგენს.

შპს „საზღვაო ტექსერვისი“ რომ წამგებიანია, ამას კომპანიის მიერ გამოქვეყნებული 2018-19 წლების ანგარიშგება ადასტურებს.

2017 წელს საწარმოს ზარალი 59 253 ლარს შეადგენდა, 2018 წელს ზარალის ოდენობა 43 314 ლარამდე შემცირდა, ხოლო 2019 წელს ზარალის მოცულობა 46 590 ლარამდე გაიზარდა.

tendermonitor.ge-ის ინფორმაციით, საწარმოს 227 ტენდერში აქვს მონაწილეობა მიღებული, რომელთა 23% შპს „საზღვაო ტექსერვისის“ სასარგებლოდ დასრულდა. წარმატებული ტენდერების საერთო სავარაუდო ღირებულება 707 755 ლარია, ხოლო ფაქტობრივი ღირებულება 672 756 ლარი. მათივე ინფორმაციით, კომპანიას 1760 გამარტივებული შესყიდვა აქვს მოგებული, რომელთა საერთო ღირებულება 2 966 071 ლარია.

რაც შეეხება შპს „საქართველოს“, კომპანია მეწარმეთა და არასამეწარმეო იურიდიული პირების რეესტრში 2019 წელს დარეგისტრირდა. კომპანიის დირექტორი და წილის 100%–ის მფლობელი გურამ დუმბაძეა.

ბაჩო ადამია