„გახსნის შემდეგ იმაზე კარგი სურათი გვაქვს ვიდრე ჩვენ წარმოგვედგინა, რაც გამოიხატება იმაში, რომ არამხოლოდ ძველი მომხმარებელი, რომელსაც ჯანსაღი ცხოვრების წესი მონატრებული ჰქონდა, არამედ სულ ახალი მომხმარებლებიც შემოგვიერთდნენ და მგონია, რომ მოთხოვნის ზრდა ხანგრძლივმა ჩაკეტვამ და მოსახლეობაში ჯანსაღი ცხოვრებისადმი მონატრებამ გამოიწვია, თუმცა გაზრდილი მოთხოვნა იმ პრობლემებს  ვერ აგვარებს რის წინაშეც დღეს სექტორი დგას“ -  ამის შესახებ, რადიო კომერსანტის გადაცემაში „კომერსანტის დილა“ „ ოკტოპუს“ ფიტნეს კლუბის დირექტორმა გიორგი ასათიანმა ისაუბრა.

მისი განმარტებით ფიტნეს კლუბების ნაწილმა მუშაობის გაგრძელება ვეღარ შეძლო, ნაწილი კი ფინანსური პრობლემების წინაშეა.

„ჩვენ ერთი წელი დახურული ვიყავით, ხოლო ერთწლიანი ჩაკეტვა ბიზნესს წარმოუდგენლად რთულ მდგომარეობაში აყენებს, რადგან ამ წლის განმავლობაში უამრავი საბანკო ვალდებულება, სესხები და მომწოდებლების ვალდებულება დაგვიგროვდა. ამ პერიოდში უამრავი ფიქსირებული ხარჯი გვქონდა, რისი გადახდაც კომპანიას დაკეტვის პერიოდშიც უწევდა და შესაბამისად  ძალიან დიდი მინუსით მოგვიწია მუშაობის განახლება.

როდესაც კომპანია არსდება ის 0-იდან იწყებს მუშაობას და ჩვენ შემთხვევაში მუშაობა ძალიან დიდი მინუსით განვაახლეთ, საიდანაც ძალიან გვინდა რომ გამოვძვრეთ და შევძლოთ იმ საქმის გაგრძელება, რაც არა მარტო მოსახლეობის ჯანსაღ ცხოვრებაში ჩართვას, არამედ ეკონომიკაში წვლილის შეტანას და ქვეყნის განვითარებას გულისხმობს.“ - აღნიშნა გიორგი ასათიანმა

ასათიანის განმარტებით სახელმწიფოს მხრიდან აქცენტი ტურიზმის სექტორზეა გაკეთებული და დანარჩენი სექტორები და ინდუსტრიები მსგავსი შეღავათებით ვერ სარგებლობენ.

„მაგალითისთვის, ტურიზმის სექტორს 4 თვის საშემოსავლო დავალიანება ჩამოეწერა, ასევე ჩამოაწერეს ქონების გადასახადი, ჩვენზე ეს შეღავათი არ გავრცელებულა. თუმცა რომ გავრცელებულიყო ძალიან დაგვეხმარებოდა და უფრო წელში გამართულები ვიქნებოდით, მართალია ეს ყველა პრობლემას არ მოგვიგვარებდა, მაგრამ დახმარება იქნებოდა, რადგან ამ მომენტისთვის თითოეული გამოწვდილი ხელი  ძალიან მნიშვნელოვანია.“ -  აღნიშნა გიორგი ასათიანმა.

ასათიანმა გადაცემაში საფასო პოლიტიკაზეც ისაუბრა და აღნიშნა, რომ კლუბებს ფასები არ გაუზრდიათ და ქვეყანაში არსებული ეკონომიკური კრიზისიდან გამომდინარე არსებული საფასო პოლიტიკის შენარჩუნებას მაქსიმალურად ცდილობენ, მისივე განცხადებით ფასის ზრდამ შესაძლოა მომხმარებლის დაკარგვა გამოიწვიოს.

გიორგი ასათიანმა გადაცემაში დაწესებულ რეგულაციებზე და შეზღუდვებზეც ისაუბრა და განმარტა, რომ მომხმარებელი დარბაზში და კლუბის ყველა ზონაში პირბადით უნდა იყოს, თუმცა ინტენსიური ვარჯიშის დროს როდესაც სუნთქვის გახშირება ხდება მაშინ პირბადის ტარება აუცილებელი არ არის.

რაც შეეხება თვითონ კლუბისთვის დაწესებულ რეგულაციებს, კლუბის თანამშრომლებს კოვიდზე სისტემატიური გატესტვა მოეთხოვებათ.

„ასევე აღმართული ტრენაჟორებს შორის, გასახდელებში გაუქმებული გვაქვს ყოველი მეორე კაბინა, გამკაცრებული გვაქვს სანიტარული დეზინფექციის ნორმები, გვაქვს წინასწარი ჩაწერები ჯგუფურ ვარჯიშებზე და კლუბში დასაშვებ ადამიანებზე დაწესებული გვაქვს ლიმიტი, რასაც ჩვენ ლაივ რეჟიმში ვაკონტროლებთ და სპეციალური აპლიკაციის მეშვეობით ჩვენ მომხმარებელს შეუძლია რომ თვალი ადევნოს თუ რა რაოდენობის მომხმარებელი იმყოფება ამა თუ იმ კლუბში.“ - აღნიშნა გიორგი ასათიანმა.

თაკო კვაჭანტირაძე