ეროვნული ბანკის პრეზიდენტმა რამდენიმე ბრძანება გამოსცა, რომლის მიხედვითაც გარკვეული საბანკო რეგულაციები სანქციების რეჟიმთან შესაბამისობაში მოიყვანა. საუბარია ფულის გათეთრებისა და ტერორიზმის დაფინანსების აღკვეთის წინააღმდეგ გასატარებელ რეგულაციებზე, რომლის ნაწილიც საქართველო ყოველთვის იყო. თუმცა რუსეთ-უკრაინის ომის შემდეგ, ქვეყანა სანქციების პაკეტს მიუერთდა, რითაც სებ-თან ერთად ქვეყანაში მოქმედმა საფინანსო ინსტიტუტებმაც გარკვეული ვალდებულებები აიღეს. ამჯერად კი კობა გვენეტაძის ბრძანების თანახმად, ჯარიმების ნაწილი დაზუსტდა.
„ვალუტის გადამცვლელი პუნქტებისა და მათი დირექტორების მიმართ ფულადი ჯარიმების ოდენობის განსაზღვრის, დაკისრებისა და აღსრულების წესის დამტკიცების თაობაზე“ საქართველოს ეროვნული ბანკის პრეზიდენტის 2020 წლის 5 თებერვლის №17/04 ბრძანებაში შევიდა ცვლილება და ფულის გათეთრებისა და ტერორიზმის დაფინანსების აღკვეთის, ეროვნული ბანკის მიერ წერილობითი მითითებით მოთხოვნილ სანქციათა რეჟიმებით გათვალისწინებული მოთხოვნების შესრულების ხელშეწყობის მიზნებისათვის პროგრამული (ელექტრონული) სისტემის, (რომელიც უზრუნველყოფს საყურადღებო/საეჭვო ნიშნების, მათ შორის, დანაწევრებული ოპერაციების (გარიგებების) გამოვლენას და პირის ავტომატურ გადამოწმებას პოლიტიკურად აქტიურ, გაეროს უშიშროების საბჭოს რეზოლუციებით და ეროვნული ბანკის მიერ წერილობითი მითითებებით მოთხოვნილ სანქციათა რეჟიმებით გათვალისწინებულ სანქციადაკისრებულ პირთა სიებში) არქონის ან მნიშვნელოვანი ხარვეზებით ფუნქციონირების შემთხვევაში ჯარიმა განისაზღვრა 10 000 ლარის ოდენობით.
გაეროს უშიშროების საბჭოს რეზოლუციებით გათვალისწინებულ სანქციადაკისრებულ პირთან ან/და ეროვნული ბანკის მიერ წერილობითი მითითებებით მოთხოვნილ სანქციათა რეჟიმებით გათვალისწინებული მოთხოვნების დარღვევით ან გვერდის ავლით განხორციელებული ოპერაციების (გარიგების) გამოვლენის შემთხვევაში, დარღვევის თითოეულ ფაქტზე ჯარიმა 5 000 ლარია.
ასევე, სესხის გამცემი სუბიექტისთვის ფულადი ჯარიმის ოდენობის განსაზღვრის, დაკისრებისა და აღსრულების წესის დამტკიცების თაობაზე“ საქართველოს ეროვნული ბანკის პრეზიდენტის 2018 წლის 27 სექტემბრის №218/04 ბრძანებით დამტკიცებული წესი დაკორექტირდა და ამიერიდან პროგრამული (ელექტრონული) სისტემის არქონის ან მნიშვნელოვანი ხარვეზებით ფუნქციონირების შემთხვევაში ჯარიმა 15 000 ლარი იქნება, ხოლო სანქციათა რეჟიმებით გათვალისწინებული მოთხოვნების დარღვევით ან გვერდის ავლით განხორციელებული ოპერაციების (გარიგების) გამოვლენის შემთხვევაში, დარღვევის თითოეულ ფაქტზე ჯარიმა 7 000 ლარია.
„საგადახდო მომსახურების პროვაიდერის და მისი ადმინისტრატორების მიმართ ფულადი ჯარიმის ოდენობის განსაზღვრის, დაკისრებისა და აღსრულების წესის დამტკიცების თაობაზე“ საქართველოს ეროვნული ბანკის პრეზიდენტის 2017 წლის 13 ივნისის №87/04 ბრძანებით, ფულის გათეთრებისა და ტერორიზმის დაფინანსების აღკვეთის, ეროვნული ბანკის მიერ წერილობითი მითითებით მოთხოვნილ სანქციათა რეჟიმებით გათვალისწინებული მოთხოვნების შესრულების ხელშეწყობის მიზნებისათვის პროგრამული (ელექტრონული) სისტემის (რომელიც უზრუნველყოფს საყურადღებო/საეჭვო ნიშნების, მათ შორის, დანაწევრებული ოპერაციების (გარიგებების) გამოვლენას და პირის ავტომატურ გადამოწმებას პოლიტიკურად აქტიურ, გაეროს უშიშროების საბჭოს და ეროვნული ბანკის მიერ წერილობითი მითითებებით მოთხოვნილ სანქციათა რეჟიმებით გათვალისწინებულ სანქციადაკისრებულ პირთა სიებში) არქონის ან მნიშვნელოვანი ხარვეზებით ფუნქციონირების შემთხვევაში – 15 000 ლარის ოდენობით“;
სანქციათა რეჟიმებით გათვალისწინებული მოთხოვნების დარღვევით ან გვერდის ავლით განხორციელებული ოპერაციების (გარიგების) გამოვლენის შემთხვევაში დარღვევის თითოეულ ფაქტზე ჯარიმა 7 000 ლარი გახდა.
როგორც „კომერსანტს“ სებ-ში განუცხადეს, აღნიშნული ცვლილებების მიზანი არის აშშ-ის, დიდი ბრიტანეთის და ევროკავშირის მიერ დაწესებულ სანქციათა რეჟიმებთან შესაბამისობის უზრუნველყოფა.
„როგორც თქვენთვის ცნობილია საქართველოს ეროვნული ბანკის წერილობითი მითითების საფუძველზე, საფინანსო სექტორის წარმომადგენლები შეუერთდნენ საერთაშორისო სანქციების მოთხოვნებს. წარმოდგენილი ცვლილებებით წესდება ჯარიმები ეროვნული ბანკის ზემოაღნიშნული წერილობითი მითითების დარღვევისთვის, ასევე ისეთი შემთხვევისთვის, როდესაც საფინანსო სექტორის წარმომადგენელი ვერ უზრუნველყოფს სანქცირებული პირების გამოვლენისთვის საჭირო პროგრამული უზრუნველყოფის გამართულ ფუნქციონირებას“, - აცხადებენ საქართველოს ეროვნულ ბანკში.