საყოველთაო ჯანდაცვის პროგრამის სერვისის მიმწოდებელთა წრე მნიშვნელოვნად შემცირდება. ამის მიზეზი შეიძლება გახდეს სელექციური კონტრაქტირება, რომლის განხორციელებას მთავრობა ჯანდაცვის რეფორმის ფარგლებში გეგმავს. ეს ნიშნავს, რომ საყოველთაო ჯანდაცვის პროგრამისთვის საავადმყოფოების შერჩევის კრიტერიუმები  კლინიკის მრავალპროფილური საქმიანობა და მომსახურების ხარისხი იქნება. კლინიკების ხელმძღვანელები პროექტს მხარს უჭერენ და აცხადებენ, რომ ცვლილება მომსახურების ხარისხის გაუმჯობესებას, პაციენტის უფლებების დაცვას და საყოველთაო ჯანდაცვის ბიუჯეტის ეფექტურად ხარჯვას შეუწყობს ხელს.

როგორც  ნ.ბოხუას სახელობის სისხლძარღვთა და გულის დაავადებათა ცენტრის დირექტორი კოტე ყიფიანი ,,კომერსანტთან“ აღნიშნავს, ახალი კონცეფცია კლინიკების ნაწილის გაკოტრებას გამოიწვევს, თუმცა პაციენტების უსაფრთხოების და მაღალი სამედიცინო სტანდარტის დასანერგად ზომები გასამკაცრებელია.

,,სელექტიური კონტრაქტირება მტკივნეული, მაგრამ აბსოლუტურად სწორი გადაწყვეტილებაა. კლინიკა მარტო შენობა არ არის, კვალიფიკაციური კადრი და თანამედროვე ტექნოლოგიებთან უნდა იყოს ასოცირებული. უმძიმესი სიტუაციაა რეალურად, ამდენი კლინიკა ვერ იქნება ვერანაირად ასეთ პატარა ქვეყანაში, ამდენი პაციენტის ფონზე, რომელიც სხვადასხვა კლინიკებშია გაფანტული. ხარისხით კი ყველა ნამდვილად ვერ გამოირჩევა. როცა სელექტიურ კონტრაქტირებაზეა საუბარი, გათვალისწინებული უნდა იყოს, ვისთან დაიდოს კონტრაქტი და ვისთან - არა. ის, რომ კარგად ვიცნობ და ლამაზი შენობაა, საკმარისი არ არის. გადამწყვეტი უნდა იყოს პროფესიონალი ექიმები, სამედიცინო დანადგარები და სხვა, ბევრი კრიტერიუმია, როგორც მსოფლიოში, ასევე საქართველოშიც, რის გათვალისწინებაც მნიშვნელოვანია. ,,ახალ ველოსიპედს“ არ ვიგონებთ! ცხადია, ყველა ვერ ისარგებლებს და ზოგიც შეიძლება გაკოტრდეს, მაგრამ სხვა გზა არ არსებობს“, - აცხადებს ყიფიანი და დასძენს, რომ მთავრობა მსგავსი სერვისის დანერგვაზე ადრეც მუშაობდა, თუმცა ხან არჩევნებმა, ხანაც სხვა გარემოებებმა  შეუშალა ხელი.

,,ბიუჯეტიდან, ასევე მოსახლეობის ჯიბიდან დიდძალი ფული იხარჯება და ჯანდაცვაში შედეგი ნაკლებია. მიმაჩნია, რომ ძალიან მკაცრად უნდა გატარდეს ზომები. ამხელა კლინიკებია და ექთნების რაოდენობა ფიზიკურად არასაკმარისია, არის ასევე  კვალიფიკაციის პრობლემა,  რაც საბოლოოდ მომსახურების ხარისხზე აისახება. თუ ეს საკითხი არ მოგვარდება, მუდმივად იქნება ვაკჰანალია. რეფორმის საშუალებით შესაძლებელი იქნება, რომ საბოლოოდ ძლიერი დარჩეს, ვინც დააკმაყოფილებს შერჩეულ კრიტერიუმს, ამიტომ იდეას მივესალმები. მესმის, რომ მტკივნეული პროცესია, ადამიანებმა ჩადეს ფული, მაგრამ მედიცინა მხოლოდ ბიზნესი არ არის, ადამიანების სიცოცხლეა. იმის გამო, რომ შეიძლება ვინმე დაზარალდეს, ხალხს ვერ დავღუპავთ? რა ვქნათ, ჩვენი მშობლები, შვილები დავღუპოთ, რომლებიც შეიძლება  გაუმართავ კლინიკებში მოხვდნენ და მათ სიცოცხლეს დიდი საფრთხე დაემუქრება. პაციენტების მოზიდვის ყველა საშუალებას პოულობენ სხვადასხვა ხერხით, მათ შორის ძალიან ცუდი ხერხებსაც იყენებენ და ამას ბოლო უნდა მოეღოს. გაკოტრდებიან და გასაგებია, მაგრამ მთავრობამ მკაცრი მიდგომა უნდა გამოავლინოს, რაღაც პრეცენდენტებს თუ დაუშვებს, ეს ძალიან ცუდი იქნება“, - აცხადებს კომერსანტთან კოტე ყიფიანი.

ცნობისთვის, ,,სელექტიური კონტრაქტირება” საყოველთაო ჯანდაცვის პროგრამის ფარგლებში სერვისის მიმწოდებელი საავადმყოფოების შერჩევას გულისხმობს. საქართველოში იგი 2017 წლიდან ამოქმედდა და პირველ ეტაპზე სამშობიაროებს შეეხო.

პრინციპი ასეთია: სელექტიური კონტრაქტირება ანუ საყოველთაო ჯანდაცვის პროგრამაში კლინიკის ჩართვა იმ შემთხვევაში მოხდება, თუ კლინიკაში წელიწადში მინიმუმ 500 მშობიარეა და მინიჭებული აქვს შესაბამისი დონე (სერვისების სირთულის მიხედვით). პროგრამაში დარჩებიან მხოლოდ ის კლინიკები, რომლებიც ამ ორ კრიტერიუმს აკმაყოფილებენ. პირველ ეტაპზე ცვლილებები სამ ქალაქში: თბილისში, ქუთაისსა და ბათუმში განხორციელდა, რადგან ამ ქალაქებში უკვე არსებობს 2 ან მეტი სერვისების მიმწოდებელი დაწესებულება.  საყოველთაო ჯანდაცვის პროგრამის მეორე ტალღის ფარგლებში, სელექციური კონტრაქტირება სხვა პროფილის სამედიცინო დაწესებულებებშიც იგეგმება.