საქართველოში სელის ზეთის მწარმოებელი ზაქარია სვიმონიშვილი ინვესტორს ეძებს. როგორც ,,კომერსანტთან“ ამბობს, ის ერთადერთია საქართველოში, რომელიც 100%-ით ნატურალურ სელის ზეთს ამზადებს. პროდუქტის უპირატესობა ხარისხი და ბუნებრივი, სასიცოცხლო თვისებების შენარჩუნებაა, რაც დამზადების ტექნოლოგიას უკავშირდება.
როგორც მეწარმე ამბობს, ზეთი იწურება სპეციალურად მუხის კასრში ცივი დაწნეხვის მეთოდით, ამიტომ სრულად შენარჩუნებულია ყველა ის სასიცოცხლო თვისება, რაც მცენარეს გააჩნია.
„წელს დავიწყე წარმოება. მანამდე სრულყოფილად შევისწავლე ბაზარი და ვნახე, რომ არ არსებობს სელის ქართული წარმოება. პირველი მწარმოებელი ვარ, რომელიც მაღალი ხარისხის, 100%-ით ნატურალურ სელის ზეთს აწარმოებს. ვიყენებ მთლიანად ცივი დაწურვის მეთოდს, ყოველგვარი კონსერვანტების გარეშე. ძირითადად ონლაინ იყიდება. თავდაპირველად ვცადე გამეყიდა სააფთიაქო ქსელებშიც, მაგრამ გაფილტვრა მომთხოვეს, რაზეც უარი განვაცხადე. გაფილტრული სელის ზეთი გემურ თვისებებს კარგავს. მისი უპირატესობა კი ისაა, რომ ცოცხალი ზეთია, ვიტამინებით სავსე, მოითხოვს შენახვის რეჟიმის ზედმიწევბით დაცვას. წინააღმდეგ შემთხვევაში, იძენს სიმწარეს და ამავდროულად კარგავს სასარგებლო თვისებებსაც. რაც ბაზარზე იყიდება, უცხოური წარმოშობის სელის ზეთი, ძირითადად არასწორი ტექნოლოგიით არის დამუშავებული, რის გამოც მომწარო გემოთი ხასიათდება“, - ამბობს ზაქარია სვიმონიშვილი.
მისი თქმით, პროდუქტი დარეგისტრირებულია და ლაბორატორიულად შემოწმებულია გარემოს დაცვისა და სოფლის მეურნმეობის სამინისტროს ლაბორატორიაში.
წარმოებაში გამოყენებულია რუსული ნედლეული. როგორც მეწარმე ამბობს, რუსული სელი მსოფლიოში საუკეთესოდ მიიჩნევა და აკმაყოფილებს სტანდარტს, რაც ხარისხიანი ზეთის საწარმოებლად არის საჭირო.
„ხშირ შემთხვევაში, სელის მარცვალს ხალავენ და მერე იწურება, რათა მეტი გამოსავლიანობა ჰქონდეს, სამაგიეროდ, გემური თვისებები იკარგება. ამით ფასი შედარებით დაბალი იქნება, მაგრამ სარგებლის ნაცვლად, შეიძლება გავნოს. ჩვენ ნედლეული რუსეთიდან ჩამოგავქვს. არის ინდური და პოლონური, მაგრამ არჩევანი რუსულ ნედლეულზე გავაკეთეთ, ხარისხიდან გამომდინარე. ჯერჯერობით ონლაინ გაყიდვებზე ვმუშაობთ, მაგრამ დაინტერესება თუ იქნება და გამოჩნდება ინვესტორი, სელის ზეთის წარმოებას როგორც ბზინესის, ასევე ეკონომიკისთვისაც, დიდი მოგების მოტანა შეუძლია“, - უთხრა სვიმონიშვილმა „კომერსანტს“.
რაც შეეხება ფასს, ფლაკონის მოცულობის მიხედვით განისაზღვრება და 9-დან 60-70 ლარამდეა.
აღსანიშნავია, რომ სელის ზეთს მოიხსენიებენ, როგორც თხევად ოქროს, რომელიც ძვირფასი მიკროელემენტებისა და ჯანმრთელობისთვის აუცილებელი მჟავების წყაროა. წარმოადგენს სასარგებლო, სამკურნალო საშუალებას გულს-სისხლძარღვთა დაავადების, გასტრიტის, კოლიტის, ბუასილის სამკურნალოდ, ასევე გააჩნია იმუნიტეტის გამაძლიერებელი ფუნქცია და სხვა.
გარდა სელის ზეთისა, ზაქარია სვიმონიშვილი აწარმოებს გოგრის თესლის ზეთს, რომელიც 100%-ით ქართული პროდუქტია.
„გოგრის თესლის ზეთი წარმოუდგენლად სასარგებლოა. რეკომენდებულია სამკურნალო და დიეტურ კვებაში. აქაც მნიშვნელოვანია, რომ მხოლოდ ცივი დაწურვის მეთოდით დამზადდეს, რითაც ყველა ღირებული ნივთიერება და თვისება ნარჩუნდება. გოგრის თესლის ზეთს წარმატებით იყენებენ მედიცინაში. მრავალი დაავადების პროფილაქტიკისა და მკურნალობის მიზნით. ნედლეულს დასავლეთ საქართველოში ვყიდულობთ. ამდენად, იგი საქართველოში დამზადებული, 100%-ით ქართული პროდუქტია“, - დასძენს სვიმონიშვილი „კომერსანტთან“ საუბარში.
გარდა ამისა, როგორც სპეციალისტები აღნიშნავენ, ბოლო წლების განმავლობაში მსოფლიო ბაზრებზე, ასევე საქართველოშიც, გაიზარდა მოთხოვნა გოგრის თესლზე, განსაკუთრებით კი გოგრის თესლის ზეთის მიმართ. ამით არის გამოწვეული ინტერესი ფერმერთა მხრიდანაც - გოგრის მოშენება სოფლის მეურნეობაში დასაქმებული მეწარმეებისთვის პრიორიტეტულ მიმართულებად მიიჩნევა.