დღეს, სემეკ-მა მორიგ საჯარო სხდომაზე, სხვა საკითხებთან ერთად, სამომხმარებლო ტარიფების თემაც განიხილა. 

კონკრეტულად კი, კომისიის გადაწყვეტილებით, დაიწყო საჯარო-ადმინისტრაციული წარმოება შპს „სოკარ ჯორჯია გაზის“, სს „საქორგგაზის“ და შპს „თელავგაზისთვის“ ბუნებრივი გაზის მიწოდების, განაწილების, გატარებისა და მოხმარების ტარიფების დადგენის მიზნით. მოსაზრებების წარმოდგენის ვადად განისაზღვრა მიმდინარე წლის 4 აგვისტო, ხოლო დადგენილებების გამოცემის ვადად, 13 დეკემბერი.

როგორც  სემეკ-ში „კომერსანტს“ განუცხადებს, ტარიფი შენარჩუნდება, ამ ეტაპზე მისი შეცვლა არ იგეგმება.

„ამ ეტაპზე, კომისიას მოლოდინი აქვს რომ, თუ რაიმე რადიკალური ცვლილება არ მოხდება, ტარიფი შენარჩუნება“, -  აცხადებენ სემეკ-ში.

ამ საკითხზე საქართველოს ენერგეტიკისა და წყალმომარაგების მარეგულირებელი ეროვნული კომისიის თავმჯდომარემ დავით ნარმანიამაც, სემეკ-ის სხდომამდე ერთი დღით ადრე მედიასთნ ისაუბრა და აღნიშნა, რომ ელექტროენერგიის, ბუნებრივი აირისა და წყალმომარაგების ტარიფების ზრდას არ ელოდება.

 „ამის მოლოდინი არ გვაქვს, რადგან სხვადასხვა ფაქტორი, რომელიც მოქმედებს ტარიფებზე, არ გაუარესებულა, მათ შორის არც სავალუტო კურსი, არც ისეთი ფაქტორები, რაც გვიბიძგებს, დავიწყოთ მუშაობა ტარიფების ზრდაზე. ელექტროენერგიის ტარიფი დამოკიდებულია იმპორტის მოცულობაზე, ვალუტის კურსზე, რადგან ჩვენს სამომხმარებლო კალათაში საკმაოდ დიდი წილი უჭირავს იმპორტის მაჩვენებელს, ასევე სექტორში განხორციელებულ ინვესტიციებზეა დამოკიდებული. გაზის ტარიფი პირდაპირ კურსზეა დამოკიდებული, თუმცა, როცა ჩვენ დავადგინეთ, მაშინაც საკმაოდ მაღალი იყო ვალუტის კურსი ერთი მხრივ, მეორე მხრივ, გაზის მოხმარების მოცულობა გაზრდილია, შესაბამისად, ეს პირიქით მოქმედებს, ანუ ტარიფზე ზეწოლას ამსუბუქებს. წყალმომარაგების ტარიფები 2023 წლის ბოლომდე გვაქვს დადგენილი და ამას გეგმურად ისედაც არ უწევს გადახედვა, არც არაგეგმურ გადახედვაზე გვაქვს განაცხადი მიღებული. ამიტომ, ტარიფებთან დაკავშირებით ვართ მშვიდად“, – განაცხადა დავით ნარმანიამ.

თაკო კვაჭანტირაძე